ليه البنك المركزي قرر تثبيت سعر الفائدة؟

البنك المركزي المصري أعلن قرار مهم… قرار ناس كتير كانت مستنيّاه لكنه خالف التوقعات وقرر تثبيت أسعار الفايدة من غير أي تغيير في سابع اجتماعات البنك خلال 2025.

قرار زي ده بيأثر على كل حاجة… من قروض العربيات والشقق، لأسعار السلع، لغاية استثمار الشركات.

واللي خلّى ناس كتير تسأل:

هو ليه الفايدة ما نزلتش؟ وليه المركزي اختار التثبيت بالذات؟ وهل ده معناه إننا هنستنى فترة أطوّل قبل أي خفض؟

أسئلة كتير… وعلشان كده، في الفيديو ده هنتكلم  عن الست أسباب اللي خلت يقرر تثبيت الفايدة.

السبب الأول: التضخم لسه فوق الطبيعي
الأسعار لسن عالية… والتضخم حوالي 12٪، وده معناه إن أي خفض للفايدة دلوقتي ممكن يشعل الأسعار أكتر. فالمركزي لعبها أمان.

السبب التاني: مخاطر جاية من العالم برا
في مشاكل في الشحن، وأسعار عالمية بتتحرك، وكمان توترات سياسية. أي حاجة من دول ممكن تزق التضخم لفوق. علشان كده التثبيت كان اختيار آمن.

السبب التالت: البنوك العالمية مش ثابتة على اتجاه واحد
البنوك المركزية الكبيرة ما بين رفع وتثبيت وخفض حذر… مفيش اتجاه واضح. والمركزي المصري لازم يكون ماشي بحساب عشان مايحصلش فجوة مع الأسواق التانية.

السبب الرابع: المركزي محتاج يشوف أرقام أحسن
هو مش عايز يعتمد على توقعات… عايز يشوف التضخم بينزل فعليًا شهر ورا التاني. لما ده يحصل، ساعتها التفكير في خفض الفايدة يبقى منطقي.

السبب الخامس: الاقتصاد شغال بأعلى من طاقته شوية
النمو الاقتصادي كويس، حوالي 5٪. ومع نمو قوي بالشكل ده، خفض الفايدة ممكن يزود الطلب بشكل يرفع الأسعار تاني.

السبب السادس: البطالة ارتفعت حبة صغيرة
نسبة البطالة زادت بشكل بسيط… والمركزي كان لازم يوازن بين التحكم في الأسعار وتشجيع النشاط الاقتصادي. فالتثبيت كان القرار الامثل ا يشدد ولا يرخّي.

في النهاية… القرار مبني على توازن صعب بين أسعار بترتفع، ونمو اقتصادي محتاج دعم، ومخاطر جاية من برّه وجوّه.