200 مليون دولار.. أغلى قطعة في مفاعل الضبعة؟
مصر عاشت لحظة تاريخية، لحظة تركيب وعاء ضغط المفاعل لأول وحدة نووية في مشروع الضبعة، الحدث ده مش عادي لدرجة إن الرئيس السيسي بنفسه حضر، ومعاه الرئيس الروسي بوتين عبر الفيديو، ومع اللحظة دي تم توقيع أمر شراء الوقود النووي لأول مرة
طيب إيه اللي بيخلي الموضوع ضخم كده؟
لإن ببساطة وعاء ضغط المفاعل ده أهم وأغلى جزء في المفاعل النووي كله.. القطعة الواحدة ممكن توصل لـ200 مليون دولار! هو اه رقم مهول بس له سبب.
خليني أقولك: مصر شغالة على 4 وحدات نووية، التكلفة الإجمالية أقل من 25 مليار دولار.. يعني الوحدة الواحدة تكلفتها بين 6 و7 مليارات دولار
ومن الرقم ده الوعاء وحده بياخد حوالي 7% لحد 8% من تكلفة الوحدة! وده لأن دوره حساس جدًا.. هو المكان اللي بيحصل جواه الانشطار النووي نفسه.
تخيل معايا: وعاء ضخم من الفولاذ، مصمم يتحمل درجات حرارة وضغوط ما يتخيلوهاش عقل.. هو اللي بيشيل قلب المفاعل، وهو أول خط دفاع عن المفاعل كله.. ولو الجزء ده مش محكوم 100% المفاعل نفسه ما يتشغلش.. علشان كده تصنيعه بياخد سنين من الحسابات الدقيقة وفحوصات مبتسيبش حاجة للصدفة.
إحنا قدام لحظة بتقول إن مصر مش ماشية في مشروع عشوائي لأ، ماشية في أكبر مشروع طاقة في تاريخها بتكلفة محسوبة ودراسة دقيقة، وبخطوات واضحة ناحية مستقبل كهربا مستقر ونظيف.. وعاء واحد بـ200 مليون دولار.. هيعيش 60 سنة ويولد كهربا لمدن كاملة.
