ارتفاع متواصل في أسعار الذهب.. موجة صعود حادة تعيد تشكيل الأسواق العالمية
أسعار الذهب مبقتش بس خبر اقتصادي، بقت حكاية كبيرة بتهز أسواق العالم وتخلي كتير يسألوا: هو في إيه؟ وليه الذهب بيطلع للمستويات الجنونية دي؟
من أول 2025 لحد دلوقتي، المعدن الأصفر عامل صعود محصلش صعود بيخلي المحللين نفسهم محتارين ومش لاقيين تفسير منطقي ثابت.. تعالوا نحكي القصة من الأول، ببساطة ومن غير تعقيد.
أسعار الذهب بتعيش واحدة من أعنف موجات الارتفاع اللي حصلت في التاريخ الحديث، بعد ما لمس سعر الأونصة مستوى 4380 دولار في آخر أكتوبر، نزل شوية، بس مكملش، رجع وطار تاني وكأنه في سباق النهارده، الذهب واقف عند مستويات أعلى بـ55% من بداية السنة، وده رقم كبير جدًا بيعدي كل الذروات التاريخية اللي الناس كانت بتشوفها سقف مستحيل.
والأغرب إن السعر الحالي تخطى أعلى مستوى معدل حسب التضخم سجله الذهب سنة 1980، وده يخلي أي محلل يقف محتار: إيه اللي بيحصل؟
نبدأ بأكتر تفسير الناس بتحبه: "الناس بتدور على الأمان"، في الأزمات، في الحروب، في الفترات اللي الاقتصاد بيقع فيها، الذهب هو الملاذ لكن المشكلة إن الوضع الحالي مش كده الاقتصاد العالمي مش منهار، الأسهم الأمريكية قوية، وأسعار الفايدة مش قليلة، وبرغم ده الذهب بيطلع وكأنه مفيش بكرة، يعني حتى مع شوية توتر سياسي هنا وهناك، مفيش حدث كبير يخلي السعر يقفز بالشكل ده.
طب نروح لتفسير تاني مشهور: "البنوك المركزية هي اللي بتشتري ذهب"، ناس كتير شايفة إن الحكومات بتبيع سندات أمريكية وبتشتري ذهب خوفًا من مستقبل الاقتصاد الأمريكي، لكن الحقيقة الأرقام بتقول العكس، الدولار مضعفش، عوائد السندات ما ارتفعتش، وبيانات صندوق النقد الدولي بتأكد إن مشتريات البنوك من الذهب قلت مش زادت، الزيادة في قيمة الذهب جاية من السعر نفسه مش من شراء حقيقي.
طيب لو مش خوف ومش بنوك مركزية.. مين؟ هنا يظهر التفسير الأقرب للواقع: المضاربين
البيانات بتقول إن صناديق التحوط وصناديق المؤشرات هي اللي سايقة السوق دلوقتي، عندهم أكبر عدد عقود طويلة في التاريخ أكتر من 200 ألف عقد، بما يعادل 619 طن ذهب، وكل ما الفلوس تدخل صناديق الذهب، السعر يطلع ولما التدفقات تقل السعر ينزل فجأة
وبمجرد ما الفلوس ترجع، الذهب يطير تاني، يعني السوق بقى شغال بنظام "الزخم" رأس مال سريع بيدخل ويخرج، مش استثمار مبني على أساس اقتصادي ثابت.
بس الخطر الحقيقي هنا على الناس اللي شايفة الذهب "ملاذ آمن ثابت" لأن موجات الزخم دي عمرها ما بتكمل ولما بتقع، بتقع فجأة، وبتوقع معاها كل اللي دخل متأخر ولحد اللحظة، مفيش أزمة اقتصادية كبيرة تبرر الارتفاع المجنون ده، وده اللي بيخلي المحللين يحذروا: السوق منفصل عن الواقع ومحتاج تفكير قبل ما حد يغامر.
