التمر المصري يغزو إفريقيا وأوروبا.. مصر تخطط لأكبر مزرعة نخيل بالعالم بسعة 2.3 مليون نخلة
مصر تخطط لإقامة أكبر مزرعة نخيل في العالم بسعة 2.3 مليون نخلة.. بس عمرك سألت نفسك ليه مصر بقت بتراهن على التمور؟، وإزاي "النخلة" ممكن تبقى سبب في زيادة العملة الصعبة لمصر؟.. وليه العالم كله بدأ يبص على البلح المصري كمنتج استراتيجي؟.. وهل فعلاً ممكن مصر تبقى أكبر منتج ومصدر للتمور في العالم؟
الوزير كامل الوزير، نائب رئيس مجلس الوزراء، أعلن أن الدولة شغالة على إنشاء أكبر مزرعة نخيل في العالم، فيها 2.3 مليون نخلة في منطقتي توشكى والعوينات، وده مشروع ضخم جدًا بيغير شكل التنمية الزراعية والصناعية في مصر.
الهدف مش بس إنتاج البلح، الهدف إننا نعمل صناعة كاملة حوالين التمور، من الزراعة للتعبئة والتصنيع والتصدير، وده اللي هيخلي مصر مش مجرد بلد بتنتج بلح، لكن قوة اقتصادية في السوق العالمي.
الدولة شايفة في التمور أنه قطاع واعد ممكن يضيف كتير للناتج القومي، خصوصًا أن مصر أصلًا رقم واحد على مستوى العالم في إنتاج التمور بنسبة أكتر من 19% من الإنتاج العالمي!
كامل الوزير وضّح أن الواحات البحرية بقت من أهم مناطق إنتاج التمور المميزة، خصوصًا الأصناف اللي مطلوبة في التصدير زي البلح السيوي والنصف جاف، وقال كمان إن الدولة شغالة دلوقتي على تطوير المصانع ومحطات التعبئة هناك، عشان نرفع جودة المنتج المصري ونقلل الفاقد.
كمان في تعاون كبير بين مصر والإمارات من خلال جائزة خليفة الدولية لنخيل التمر، وده ساعد في تطوير مصانع ومخازن حديثة للتمور، وتأهيل المصانع علشان تاخد شهادات الجودة وسلامة الغذاء العالمية.. وده كله جزء من خطة كبيرة هدفها إن البلح المصري يرجع ياخد مكانته العالمية ويكون مصدر فخر واقتصاد في نفس الوقت.
وده كله بيصب في مصلحة مصر، لأنها رايحة ناحية اقتصاد النخيل، وممكن جدًا في السنين الجاية نسمع إن "التمر المصري" هو اللي بقى علامة تجارية عالمية بتجيب عملة صعبة وتفتح بيوت كتير.
