كارت واحد لكل خدماتك.. الكارت الموحد هيغير حياتك
إنت متخيل تبطل تمشي بورق وكروت في كل حتة؟.. الدولة خلاص قررت تختصر المشوار الطويل ده في كارت واحد اسمه "الكارت الموحد "!
الكارت ده مش بس تموين وخبز… لأ، ده كمان تأمين صحي، ومدفوعات حكومية، وسحب وشراء زي أي كارت بنكي.
يعني من الآخر، كارت واحد يخدمك في كل حاجة!
والخطوات بسيطة جدًا:
هتروح أقرب مكتب بريد وتفتح حساب بريدي.
تسجل بياناتك بالرقم القومي ورقم الموبايل.
تعمل بصمة ذكية علشان الكارت يكون باسمك فعلا.. وبعد كام يوم، توصلك رسالة فيها ميعاد ومكان الاستلام.
تروح تستلمه، ومن اللحظة دي الكارت جاهز تستخدمه في التموين أو الخبز أو التأمين الصحي.
ولو الكارت ضاع ولا يهمك، بتتصل على 15999 أو تدخل على منصة مصر الرقمية وتطلب بدل فاقد بـ 300 جنيه، وهيوصلك خلال 10 أيام عمل.
طيب مميزاته إيه؟ هقولك.. كارت واحد بدل الزحمة .. كل حاجة مؤمنة بالبصمة .. الدعم بيوصل لمستحقينه .. وتقدر تسحب وتشتري بيه في أي مكان.
الكارت ده مطبق حاليًا في محافظة بورسعيد.. وهيتم تعميمه على باقي المحافظات في وقت قريب.
يعني باختصار.. الكارت الموحد بداية مرحلة جديدة من التحول الرقمي في مصر.. خدمة أسرع، نظام أوضح، وحياة أسهل.
