فاتورة الكهرباء طلعت عالية؟.. اعرف إزاي تقدم تظلم خلال دقايق وأنت في بيتك
اتصدمت من فاتورة الكهرباء؟.. حاسس إن الرقم مش طبيعي؟.. ماتقلقش .. تقدر تقدم تظلم بنفسك بكل سهولة!
أول حاجة:
ادخل على موقع الشركة القابضة لكهرباء مصر.. هتكتب بياناتك: الاسم، رقم الموبايل، المحافظة، والحي، بعدها سجل العنوان كامل رقم البيت، الدور، الشارع، وبعدين حط كود السداد الإلكتروني اللي مكتوب على الفاتورة.
في الخانة اللي بعدها، اكتب سبب الشكوى: زي مثلًا "الاستهلاك مش متناسب مع قراءتي الفعلية"
وارفق صورتين:
واحدة لآخر قراءة في العداد، والتانية لإيصال الكهرباء.. لو فعلاً فيه خطأ؟ الفاتورة بتتعدل فورًا وبيصدروا واحدة جديدة بالقيمة الصحيحة.
وكمان تقدر تعمل كل ده من الموبايل!.. عن طريق تطبيقات وزارة الكهرباء زي: احسب فاتورتك، وشكاوى فواتير الكهرباء، وخدمات الكهرباء الذكية
كل اللي عليك: تحمل التطبيق، تختار شركة التوزيع من بيانات فاتورتك، تصور الفاتورة، وترفعها، وتستنى رسالة التأكيد إن الشكوى اتسجلت.
يعني ببساطة: لو فاتورتك مش مظبوطة، مافيش داعي للزعل، قدم تظلمك أونلاين وخلي حقك يرجعلك وانت قاعد في بيتك.
