دليلك الشامل لـ شروط وأوراق تأسيس مزارع الدواجن.. مشروعك الزراعي الأكثر ربحية
مشروع مزرعة الدواجن بقى من أكتر المشاريع اللي الشباب بيفكر فيها اليومين دول.
وده لأنها مش بس مربحة، لكن كمان دورة إنتاجها قصيرة والطلب عليها ما بيخلصش، يعني دايمًا في ناس بتشتري .. غير كده الأرقام بتتكلم .. اصل استثمارات صناعة الدواجن في مصر وصلت حوالي 200 مليار جنيه، وفي أكتر من 30 ألف مزرعة دواجن شغالة في كل المحافظات، ووراهم 3 مليون عامل بيأكلوا عيش من وراها.
بس علشان تبدأ صح، لازم تبقى عارف الأوراق، الشروط، والخطوات اللي هتخليك تؤسس مزرعتك بطريقة قانونية وتكسب منها بضمير.
أول حاجة، لو ناوي تفتح مزرعة دواجن، لازم تقدم طلب ترخيص مزرعة دواجن رسمي لوزارة الزراعة، وبالتحديد لقطاع الإنتاج الحيواني والداجني.. الوزارة بتطلب شوية أوراق ضرورية، زي:
صورة من رخصة البناء، وصورة من ملكية الأرض، ودراسة جدوى اقتصادية للمشروع، وشهادة خلو الأرض من الأمراض الحيوانية، ودراسة أمان حيوي للمزرعة.
وبعد ما تجمع الورق ده، لازم تحقق كمان شوية شروط مهمة عشان تاخد الترخيص بسهولة.
يعني تاخد موافقة الوحدة المحلية في منطقتك.
وكمان موافقة إدارة حماية الأراضي، عشان يتأكدوا إن الأرض سليمة ومافيش تعديات.
ويكون البناء مطابق لمواصفات الصحة العامة.
وكمان تحدد نوع الطيور اللي هتربيها (فراخ، بط، رومي وهكذا).
وطبعا توضح رأس المال اللي هتبدأ بيه، لأن حجمه هو اللي هيحدد حجم المزرعة.
كمان لازم المزرعة تكون بعيدة عن أي تجمعات سكنية بمسافة من كيلو لحد 2 كيلو متر، وآخر خطوة: تستخرج ترخيص التشغيل.
بس الترخيص مش كفاية .. النجاح الحقيقي في التفاصيل الصغيرة .. يعني لازم تختار السلالة المناسبة للمكان اللي هتربي فيه، لأن اللي يشتغل كويس في الوجه البحري ممكن ماينجحش في الوجه القبلي بسبب اختلاف الجو.
كمان اشتري الكتاكيت من مصادر موثوقة زي مزارع معروفة أو مراكز بحوث الإنتاج الحيواني، عشان تضمن الجودة.
وخلي بالك لازم ف الأول تبدأ بشكل بسيط، مثلًا بـ200 أو 300 كتكوت في أول دورة، عشان تتعلم وتكتسب خبرة
وكمان اهتم جدًا بنظافة العنابر، التهوية، الحرارة، والرطوبة، وخليك ملتزم بجدول التحصينات ضد الأمراض
والعلف لازم يكون متوازن ومغذي، ويفضل تتابع مع دكتور بيطري لو حصل أي مشكلة.
وقبل ما تبدأ الإنتاج، فكر في التسويق! مين هيشتري منك؟ هتبيع لتجار جملة؟ لمحلات؟ ولا مباشرة للمستهلكين؟
كل ده لازم يكون واضح قبل ما تبدأ، ومع متابعة مستمرة للتكاليف والعائد، تقدر تضمن مشروع ناجح ومستمر.
وفي النهاية، مشروع مزرعة الدواجن مش محتاج تكون خبير من أول يوم، لكن محتاج تكون صابر، منظم، وبتتعلم كل دورة.
يعني لو بدأت صغير، واتعلمت من السوق، مع الوقت ممكن توصل تبقى صاحب مزرعة كبيرة من اللي بتكسب بالملايين.
