حل عبقري لأزمة الدولار.. هيدخل للدولة 7 مليارات دولار
يا ترى ايه الحل العبقري اللى الدولة بتفكر تنفذه لفترة لجاية لحل أزمة شح العملة ؟ وازاى هتدخل 7 مليار دولار من فكرة خارج الصندوق؟ والمليارت دي كله هتيجي منين؟
الحكومة من خلال وزارة الإسكان أعلنت إنها بتستهدف جمع 7 مليار دولار خلال 4 سنين من المرحلتين العاشرة والتكميلية لمشروع “بيت الوطن”، ببيع أراضي للمصريين المقيمين في الخارج.. والبيع هيحصل على مراحل، فيه مقدمات بتتجمع دلوقتي بالفعل، وبعدين أقساط سنوية أولها يبدأ 2026 وآخرها ينتهي 2029. الأراضي مطروحة في حوالي 18 مدينة سكنية.
بس قبل ما نكمل… الرقم ده مش ول تجربة .. مصر من 2012 لحد بداية 2025 جمعت 10 مليار دولار عن طريق بيع حوالي 25 ألف قطعة أرض عبر 9 مراحل يعني “بيت الوطن” مش مجرد مشروع أراضي، ده جهاز تنفس دولاري للدولة في اللحظات اللي السوق بيكتم فيها النفس.
ليه البيع بالدولار ومن الخارج حصراً؟
لأن مصر سنة واتنين فاتوا كان عندها أزمة خانقة في العملة الصعبة — بضائع محبوسة في الموانئ، تحويلات متوقفة، بنوك قلّصت مدفوعات الدولار للأفراد، قروض دولارية متوقفة. لحد ما حصل تحرير سعر الصرف في مارس 2024 واتحل جزء كبير من الأزمة. بس رغم التحسن، الدولة مش بتراهن على مجرد “استقرار”، هي بتحاول تخلق مصدر دولاري متجدد مالوش علاقة بسندات ولا سياحة ولا قناة.
طيب المغتربين جديرين بالرهان؟
الأرقام بتقول آه مش كلام إنشائي. تحويلات المصريين في الخارج كسرت الرقم القياسي العام المالي 2024/2025 ووصلت 36.5 مليار دولار، أعلى مستوى تاريخي، بزيادة 66% عن السنتين اللي قبل كده اللي كانوا حوالي 22 مليار. يعني في لحظة الدولة محتاجة تمويل، المصري اللي برا شغّال يدخل دولار بواقعية.
طيب السؤال الأهم: هل بيع أراضي حل استراتيجي ؟
فيه رأيين.. رأي بيقول: ده مصدر قوي للدولار لأنه مش مرتبط بسياحة ولا بيع غاز ولا استثمارات أجنبية مزاجية ده بيع أصل داخلي مقابل دولار حقيقي من بره… ورأي تاني شايف إن ده مش دخل إنتاجي لأنك بتبدّل أصل ثابت بسيولة مستهلكة، وبعد سنين الأصل خلص. وبالتالي لازم بالتوازي تتبني أصول وإنتاج بديل.
لكن في الواقع الحكومة مش بتتعامل مع بيت الوطن كإيراد صافي وخلاص. المشروع مرتبط بشيءين: تمويل جزء من الإنشاءات والمدن الجديدة، وتسكين شريحة عندها القدرة بالدولار بدل ما يشتري في الخارج ويحط أصوله برا.
