بدلا من الاستيراد.. تفاصيل العرض الصيني الضخم لمصر لإنشاء مصنع عملاق لمكونات محطات التحلية
في خطوة جديدة بتأكد التعاون القوي بين مصر والصين، عرضت واحدة من أكبر الشركات الصينية على الحكومة المصرية إنها تدخل في شراكة ضخمة لإقامة مصنع عملاق في مصر مخصوص لإنتاج مكونات محطات تحلية مياه البحر، عشان نبدأ نصنع بدل ما نستورد، ونقلل التكلفة ونزود قدراتنا في مجال المياه.
خلال اجتماع جمع بين رئيس مجلس الوزراء الدكتور مصطفى مدبولي، ونائب رئيس مجموعة "سيتك" الصينية ليو تشنج جون، ناقش الطرفين فرص التعاون الجديدة، خاصة في مجال تحلية المياه، واللي بقت من أولويات الدولة في السنين الأخيرة بسبب التوسع الكبير في المدن الساحلية الجديدة.
رئيس الوزراء رحب جدًا بالعرض الصيني، وقال إن التجارب السابقة مع الشركات الصينية كانت ناجحة جدًا، وإن الحكومة عندها ثقة كبيرة في قدرتهم على تنفيذ المشاريع بأعلى جودة وفي وقت قياسي.
أما نائب رئيس مجموعة "سيتك"، فاستعرض قوة الشركة وقال إنها اتأسست من 40 سنة، وحاليًا عندها استثمارات تتعدى 1.7 تريليون دولار، وبتشتغل في أكتر من 250 دولة، وعندها حوالي 234 ألف موظف حول العالم.
الشركة شغالة في مجالات كتير زي التمويل، التأمين، البنية التحتية، التعدين، الزراعة، والنقل، وكمان عندها خبرة كبيرة جدًا في تصنيع مكونات محطات التحلية.
والعرض اللي قدمته "سيتك" كان واضح:
هي مستعدة تدخل في شراكة كاملة مع مصر لتأسيس مصنع لإنتاج مكونات محطات التحلية اللي بتشتغل بتقنية "التناضح العكسي" (Reverse Osmosis – ممبرين)، وكمان الشركة جاهزة تمول المشروع بالكامل، وتشتغل مع شركاء مصريين لضمان نقل التكنولوجيا وتوطين الصناعة في البلد.
ومدبولي قال إن الخطوة دي مهمة جدًا، لأن مصر دلوقتي عندها خطة طموحة توصل إنتاج تحلية مياه البحر لـ 5 ملايين متر مكعب في اليوم خلال 5 سنين، ومع الوقت الكمية دي هتزيد لحد 10 ملايين متر مكعب يوميًا، وده رقم ضخم محتاج مصانع وإنتاج محلي للمكونات بدل ما نفضل نعتمد على الاستيراد.
وأكد كمان إن الحكومة جاهزة توفر الأراضي المطلوبة، وتعمل كل الإنشاءات المدنية الخاصة بالمصنع، وكمان تقدم كل التسهيلات والدعم للمشروع عشان يتم بسرعة.
وخليني اقولك ان رئيس الوزراء قال نصًا إن "سيتك" عندها فرصة كبيرة تكون المورد الحصري لمكونات محطات التحلية اللي مصر هتبنيها بالتقنية دي، ووجه وزير الإسكان المهندس شريف الشربيني يعقد اجتماع سريع مع ممثلي الشركة الصينية عشان يحطوا تصور نهائي للمشروع ويرفعوه للحكومة في أقرب وقت.
عشان تبقى عارف .. الموضوع مش بس عن التحلية، لكن كمان اتكلم رئيس الوزراء عن إمكانية التعاون مع نفس الشركة في مجال إنتاج البذور الزراعية، خصوصًا إن "سيتك" عندها خبرة عالمية في المجال ده، وده جزء من توجه الدولة لتحقيق الاكتفاء الذاتي في الزراعة والمياه.
يعني الصفقة دي لو تمت، هتكون خطوة قوية جدًا في طريق توطين صناعة تحلية المياه في مصر، وده معناه فرص شغل جديدة، توفير عملة صعبة، ونقلة كبيرة في مجال إدارة الموارد المائية.
