هترجع تاني منطقة فاخرة.. الحكومة هتعمل إيه علشان تحل مشكلة العتبة؟

ايه اول حاجة بتيجي في بالك اول ما تيجي سيرة العتبة.. عشوائيات وزحمة وخناقات وخطر في كل خطوة في شارع فيها وفرش وبياعين واخدين نص الطريق وعربيات مش عارفة تعدي حتى المباني اللي ليها طابع أثري جميل اتحولت لمخازن وبدأ شكلها يتهد وتتفحم.
لكن خليني اقولك أن كل ده هيتغير تماما وخلاص الدولة قررت تقول stop وتبتدي صفحة جديدة.. طب إيه اللي بيحصل في العتبة؟.. وشكلها هيتغير إزاي؟.. ده اللي هنعرفه.
مشروع تطوير العتبة اللي شغال دلوقتي مش مجرد شوية دهانات ورصف وخلاص لأ دي خطة كاملة لإعادة تنظيم المنطقة من أول وجديد تبدأ بإنهم يشيلوا الإشغالات والباعة الجائلين من الشوارع اللي حوالي الميدان زي شارع الجوهرى والعسيلي ويوسف نجيب وهيتم توزيعهم على ترابيزات محترمة متقسمة ومتخططة كل بايع ليه مكانه ومفيش فرشة نص الشارع تاني.
والأهم إن الخطة مش ضد البياعين بالعكس دي معمولة علشانهم يشتغلوا في مكان نضيف وآمن ومنظم من غير ما يضايقوا الناس ولا أصحاب المحلات وكمان هيكون فيه ممرات للناس تمشي فيها وطريق للعربيات يعني الدنيا هتبقى ماشية بنظام وشكل حضاري.
وبيشتغلوا كمان على البنية التحتية من تحت يعني الميه والصرف والكهربا كله بيتجدد وفوق كده بيعملوا واجهات العمارات من أول وجديد بيرجعوا شكل القاهرة الخديوية زي زمان الشياكة والطابع المعماري القديم اللي بيخلي المكان له هيبة وتاريخ وكله بالتنسيق مع جهاز التنسيق الحضاري علشان يطلع الشكل على أصوله كأنك بتتمشى في شارع من شوارع أوروبا بس بروح مصرية.

فيه كمان شغل جامد على الحماية المدنية هيتركب نظام إطفاء وإنذار وكاميرات وأكشاك أمن يعني مش بس تنظيم وتجميل لأ كمان أمان وحماية والمفاجأة إنهم بيجهزوا 473 طاولة مخصوص للباعة الجائلين واللي بتتصنع في الورش الإنتاجية بتاعة الهيئة العامة لنظافة وتجميل القاهرة يعني شغل مصري بأيادي مصرية.
واللي بيحصل ده كله مجرد مرحلة أولى لو نجحت وده متوقع هيتنفذ نفس النظام في باقي شوارع العتبة وساعتها هنشوف المنطقة دي وهي بتتحول من رمز للفوضى لنموذج للتنظيم والجمال مشروع تطوير العتبة مش بس بيغير شكل شوارع ده بيغير شكل حياة وبيرجع للناس حقهم في شوارعهم ولبياعين حقهم في شغلهم وبيحافظ على تراث البلد وشكلها وبيثبت إن مفيش حاجة مستحيلة لما يكون في نية حقيقية للتغيير.