تفاصيل طرح أكتر من ربع مليون وحدة سكنية.. ما طريقة الحجز والموعد؟
مصر عاملة خطة جديدة لطرح أكتر من ربع مليون وحدة سكنية، بس يا ترى الوحدات الجديدة دي هتكون متاحة لكل الناس فعلا ولا في فئات معينة ليها الأولوية؟، وإيه المدن اللي داخلها الطرح الجديد؟ وهل القاهرة الكبرى ليها نصيب الأسد كالعادة؟.. والمشروع ده هيقدر يحل أزمة السكن اللي بتكبر كل سنة؟
الأيام الجاية في مصر شايلة بشرى حلوة جدا لكل اللي مستني فرصة شقة كويسة بسعر مناسب، لأن الحكومة بتجهز لطرح ضخم فيه أكتر من 260 ألف وحدة سكنية جديدة ضمن خطة الدولة لتوفير سكن لكل المصريين.
الدكتور مصطفى مدبولي، رئيس الوزراء، تابع بنفسه خطة التنفيذ، وراجع مع هيئة المجتمعات العمرانية موقف المشروعات في المدن الجديدة، من مرافق وكهربا وطرق، لحد الإسكان بأنواعه، الاجتماعي والمتوسط والفاخر.
الطرح ده جزء من توجيهات رئاسية بإنشاء 400 ألف وحدة على مراحل، والخطة ماشية بخطوات سريعة.. المرحلة الأولى كانت في أبريل 2025 بـ36 ألف وحدة، واتحجز منهم حوالي 9 آلاف، والمرحلة التانية هتبدأ في نوفمبر 2025 بـ25 ألف وحدة جديدة من خلال منصة مصر العقارية، وبعدها المرحلة التالتة في مارس 2026.
كمان الهيئة شغالة على مشروع "بيتك في مصر" للمصريين بالخارج بالدولار، وطرحت أراضي بيت الوطن في 20 مدينة بإجمالي 2333 قطعة أرض، منهم نسبة 5% لذوي الهمم.. وفي نفس الوقت، الهيئة بتطرح وحدات تجارية وإدارية بالمزاد العلني، وده بيفتح فرص استثمار جديدة ويقوي سوق العقار في مصر.
أما الموظفين المنتقلين للعاصمة الإدارية، فتم تخصيص وحدات ليهم في مشروع زهرة العاصمة بمدينة بدر والحي السكني الثالث R3، مع أولوية خاصة لذوي الهمم.
الحجز مفتوح من 12 أكتوبر لحد 11 ديسمبر 2025 عبر موقع هيئة المجتمعات العمرانية، والوحدات الجاهزة فعلاً وصل عددها أكتر من 20 ألف وحدة.. يعني من الآخر، الدولة شغالة بخطة واضحة علشان توفر سكن محترم ومناسب لكل الفئات، ودي خطوة كبيرة ناحية حلم كل مواطن يكون عنده بيته في مكان آمن ومتطور.
