اكتشاف كنز دهب جديد في مصر.. احتياطي ضخم من المعدن النفيس
يا ترى ايه حكاية كنز الدهب الجديد اللى تم اكتشفه في مصر واحتياطيه بيوصل لـ 200 ألف أونصة.. ومين الشركة اللى اكتشفت الكنز الضخم ده؟ وايه تأثيره على سعر الدهب فى مصر؟ و هل ده معناه إن مصر داخلة على طفرة تعدين شبه اللي حصلت مع منجم السكري؟ والأهم… إزاي ده ممكن يغيّر خريطة الدولار والاحتياطي الأجنبي عندنا؟
الأسبوع ده شركة آفاق للتعدين المصرية أعلنت عن كشف تجاري جديد للذهب غرب جبل علبة في منطقة شلاتين، جنوب شرق الصحرا الشرقية.. والشركة بالفعل بتستعد تقدّم دراسة الكشف لهيئة الثروة المعدنية خلال أيام.
وحسب مصادر مطلعة الاحتياطيات الأولية للكشف الجديد متقدّرة بحوالي 200 ألف أونصة ذهب كمخزون أولي… رقم مش بسيط ويبمثل بداية حقيقية لمشروع تعدين جديد داخل نفس الحزام الذهبي اللي فيه منجم السكري.
الشركة هتقدّم دراسة الجدوى للهيئة.. والهيئة عندها 60 يوم عمل لفحصها ولو اعتمدتها يبدأ فوراً تأسيس شركة مشتركة بين آفاق للتعدين وبين شلاتين للثروة المعدنية اللي منطقة الامتياز بتقع ضمن نطاقها.. والكلام ده معناه بوضوح إن الدولة شريك مباشر في المشروع من أول لحظة إنتاج.
نرجع شوية لورا.. آفاق للتعدين تأسست سنة 2018 ضمن مجموعة آفاق القابضة وخدت منطقة امتياز غرب جبل علبة سنة 2019.. والامتياز موجود على بعد 50 كم غرب ساحل البحر الأحمر، و90 كم جنوب غرب مدينة شلاتين، قريب من الحدود السودانية ودي منطقة غنية جيولوجيا وموعودة بالكثير.
الشركة لحد دلوقتي ضخت أكتر من 20 مليون دولار في أعمال البحث والاستكشاف، ودي مش تكلفة قليلة ده معناها إنهم وصلوا لنقطة يقين اقتصادي، وده سبب نقل الملف لدراسة تجارية رسمية.
مش بس كده .. الشركة شغالة حالياً على زيادة استثمارات الحفر والتنقيب لرفع الاحتياطيات بصورة أكبر، وبتجري كمان مفاوضات مع الحكومة لإنشاء مصنع كامل لإنتاج الذهب باستثمارات تقارب 50 مليون دولار، وفترة تنفيذ حوالي سنتين من يوم الإقرار.
طب ليه الحدث ده كبير اقتصاديًا؟
مصر النهارده بتنتج حوالي 15.8 طن ذهب سنويًا — أغلبه من السكري، والباقي من حمش وإيقات.. والدولة مستهدفة إنها تجذب مليار دولار استثمارات جديدة بقطاع التعدين قبل 2030 ومشاريع زي ده بتقربنا من الهدف أسرع مما كان متوقع.
وكشف زي ده له 3 تأثيرات مباشرة.. أوله دولار وسيولة خارجية: الدهب سلعة تصديرية مباشرة — يعني مصدر عملة صعبة بدون أي تحميل على الواردات
وتنيها شغل وتشغيل محلي: من أوّل عربيات النقل لحد معامل الصهر لمصانع السبائك — كل سلسلة القيمة بتحرك السوق.. وتالتها تحوّل استراتيجي: مصر خارج تصدير خام… داخلة عصر التعدين الصناعي بالشراكة مع الدولة.
