مصر تستعد لإتمام مبادلة ديون.. وهدوء في سوق الصرف
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، مصر تستعد لإتمام مبادلة ديون، وهدوء في سوق الصرف.
نبدأ من عند وزيرة التخطيط والتنمية الاقتصادية، رانيا المشاط، اللي قالت إن مصر بتستعد إنها تكمّل اتفاق جديد لمبادلة الديون مع شركاء أوروبيين قبل نهاية السنة دي، وأضافت كمان إن في اتفاقات تانية شبهه بتتجهز للسنة الجاية.
الاتفاق ده هيبقى فصل جديد في سلسلة مبادلات ديون قيمتها حوالي مليار دولار، مصر عملت زيها قبل كده مع دول زي ألمانيا وإيطاليا من التسعينات.
الفكرة ببساطة إن مصر بتبدّل ديون بتكلفة عالية، بديون تانية أرخص، والمدخرات اللي بتطلع من العملية دي بتتخصص لمشروعات تنموية معينة.
المشاط قالت في تصريحاتها على هامش اجتماعات صندوق النقد الدولي والبنك الدولي في واشنطن: إن مبادلة الديون دي وسيلة لإدارة الالتزامات بطريقة ذكية.
وأضافت كمان إنها وسيلة لخلق مساحة مالية جديدة، وكمان بتظهر إن أهداف مصر الوطنية ماشية في نفس الاتجاه مع الأهداف الدولية، وعلشان كده مصر متوقعة المزيد من اتفاقات مبادلة الديون في الفترات الجاية.
ونروح لسوق الصرف…
الدولار النهارده، عامل استقرار واضح في أغلب البنوك الحكومية والخاصة.
وسجل متوسط سعره في البنك المركزي حوالي 47.57 جنيه للشراء، و47.71 جنيه للبيع.
أما الأسعار في البنوك فكانت كده:
بنك نكست: 47.63 للشراء و47.73 للبيع.
مصرف أبوظبي الإسلامي: 47.88 للشراء و47.98 للبيع.
بنك مصر: 47.60 للشراء و47.70 للبيع.
البنك الأهلي المصري: 47.60 للشراء و47.70 للبيع.
بنك قناة السويس: 47.66 للشراء و47.76 للبيع.
بنك SAIB: 47.66 للشراء و47.76 للبيع.
المصرف العربي الدولي AIB: 47.65 للشراء و47.75 للبيع.
بنك الإسكندرية: 47.62 للشراء و47.72 للبيع.
ونختم مع تصريحات مهمة من وزير المالية أحمد كجوك، اللي كشف إن الحكومة ناوية تنفّذ مجموعة من الطروحات الجديدة قريب جدًا، وقال كمان إنه خلال الأسابيع الجاية هيتم الإعلان عن صفقة تخارج كبيرة.
كجوك وضّح، خلال الاجتماعات السنوية لصندوق النقد والبنك الدوليين، إن في صفقات منتظرة في قطاعات زي الطاقة المتجددة، ومراكز الاتصالات، وأبراج المحمول، وإن الحكومة قدمت برنامج طروحات جديد لصندوق النقد وبتنفذه بجدية.
وقال كمان إن الحكومة دمجت المراجعتين الخامسة والسادسة من برنامج الصندوق، علشان تقدر تقيّم تأثير البرنامج بناءً على بيانات يونيو، وإن أغلب الإصلاحات المطلوبة تمت بالفعل، ومتبقي خطوة واحدة بس، وهي صفقة التخارج اللي هدفها خفض المديونية وتحقيق المستهدفات الاقتصادية، والصفقة دي وصلت لمراحل متقدمة جدًا، وفي تحركات إيجابية متوقعة قريب.
واختتم كلامه إن الحكومة عندها تصور جديد لبرنامج الطروحات خلال السنة المالية الحالية، بيركز على 3 أو 4 صفقات كبيرة الحجم في مجالات زي القطاع المالي، التأمين، المطارات، الطاقة الجديدة والمتجددة، واللوجستيات.
