قفزة هائلة في عوائد السياحة.. الذهب يواصل تحطيم الأرقام القياسية.. وانهيار الدولار مستمر
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، قفزة هائلة في عوائد السياحة، والذهب يواصل تحطيم الأرقام القياسية، وانهيار الدولار مستمر.
نبدأ بأخبار حلوة… السياحة في مصر عاملة شغل جامد جدًا! الإيرادات زادت بنسبة 16.3% في السنة المالية 2024/2025، ووصلت لحوالي 16.7 مليار دولار، بعد ما كانت 14.4 مليار دولار السنة اللي قبلها، وده حسب أحدث بيانات البنك المركزي.
الزيادة دي جاية بسبب إن عدد الليالي السياحية كمان زاد بشكل كبير، وسجل 179.3 مليون ليلة، بدل 154.1 مليون ليلة في نفس الفترة من السنة اللي فاتت. يعني ببساطة، السائحين بيقعدوا أكتر وبيصرفوا أكتر، وده انعكس على الإيرادات بشكل واضح.
لكن في المقابل، قناة السويس ممرتش بنفس الحظ… الإيرادات هناك نزلت بنسبة 45.5% خلال نفس الفترة، ووصلت لـ 3.6 مليار دولار بدل 6.6 مليار السنة اللي قبلها. السبب؟ انخفاض الحمولة الصافية اللي عدّت من القناة بنسبة 55.1% لتوصل لـ 482.8 مليون طن، وعدد السفن كمان قل بنسبة 38.5% لـ حوالي 12.4 ألف سفينة.
بس المطمئن إن الانخفاض ده كان كبير في أول السنة بس، إنما في النصف التاني (من يناير لحد يونيو 2025) الانخفاض بقى بسيط جدًا… حوالي 1.4% بس، والإيرادات كانت 1.80 مليار دولار مقابل 1.83 مليار دولار في نفس الفترة من 2024. وده معناه إن فيه بوادر تعافي خفيف في حركة الملاحة العالمية اللي بتمر من القناة.
ونروح دلوقتي لسوق الدهب… اللي مولع نار! الأسعار مكملة في أرقام قياسية جديدة، وسعر جرام الدهب عيار 21 – اللي هو الأكتر انتشارًا بين المصريين – وصل النهارده لـ 5410 جنيه.
أما عيار 24 فسجل حوالي 6142.75 جنيه للجرام، وده أنقى وأعلى عيار في السوق وبيفضله كبار المستثمرين.
عيار 21 زي ما قولنا حوالي 5375 جنيه، وده اللي أغلب الناس بتشتريه سواء للزواج أو الادخار.
عيار 18 وصل لـ 4637.25 جنيه، وده الأرخص بين العيارات التانية وبيشتريه الشباب أكتر علشان تصميماته حلوة وسعره مناسب.
أما عيار 14 فسجل حوالي 3606.75 جنيه للجرام، وده الخيار الاقتصادي للناس اللي عايزة تشتري دهب بسعر معقول.
وسعر الجنيه الدهب النهارده حوالي 43280 جنيه، وده بيكون وزنه 8 جرامات من عيار 21.
وطبعًا الأسعار دي كلها مرتبطة بسعر الدولار وسعر الأوقية عالميًا، يعني أي حركة في السوق العالمي بتأثر فورًا على الأسعار هنا.
نروح بقى لسوق العملات… الدولار نازل تاني وواصل أقل مستوى ليه من أكتر من سنة!
النهارده، عدد من البنوك سجل تراجع جديد في سعر الدولار، اللي نزل تحت مستوى 47.50 جنيه للشراء والبيع. وده أول مرة يوصل للمستوى ده من يوليو 2024، لما كان بـ 47.89 جنيه.
فسجل الدولار في البنك الأهلي المصري حوالي 47.45 جنيه للشراء و47.55 جنيه للبيع.
وفي بنوك زي أبوظبي التجاري، المصرف العربي، نكست، فيصل الإسلامي، saib، مصر، والإسكندرية، نفس الأسعار تقريبًا: 47.45 شراء و47.55 بيع.
أما في بنوك البركة، أبوظبي الأول، المصرف المتحد، وكريدي أجريكول فسجل 47.40 شراء و47.50 بيع.
ونختم بخبر مهم جدًا… المدير الإقليمي للبنك الدولي في مصر واليمن وجيبوتي، ستيفان جيمبرت، أعلن إن البنك الدولي هيصرف الشريحة التانية من الدعم المالي لمصر، بقيمة 500 مليون دولار، قبل نهاية السنة دي، وده حسب تصريحاته لـ CNBC عربية.
وقال كمان إن صرف الشريحة دي مرتبط بتنفيذ مجموعة من الإصلاحات الاقتصادية، أهمها تحسين مناخ الاستثمار وتمكين القطاع الخاص عشان يقدر يحقق نمو أكبر.
وأضاف إن البنك شايف إن توقعات النمو في مصر إيجابية، بس لسه مش كفاية عشان تخلق فرص شغل كافية. ةوبحسب تقديرات البنك الدولي، النمو الاقتصادي في مصر هيكون في حدود 4.5% في المتوسط خلال التلات سنين الجايين.
