التخفيضات وصلت لـ400 ألف جنيه.. ودي أحسن فرصة للشراء.. انخفاض كبير في أسعار العربيات
اللي بيفكر يشتري عربية يلحق دلوقتي قبل ما الفرصة تضيع اصل الاسعار من اول ما شهر أكتوبر ما بدء وهي نزلت نازلة جامدة لدرجة أن في موديلات أسعارها نزلت 400 الف جنيه.
إيه اللي بيحصل في أسعار العربيات وايه الموديلات اللي أسعارها نزلت كل دي تفاصيل تعرفها معانا دلوقتي.
عارف لما تحس إن في حاجة بتحصل في السوق وانت مش مصدق؟ هو ده بالظبط اللي حصل أول يوم في شهر أكتوبر.
الناس كانت فاكراه الخبر الإشاعة، لكن طلع حقيقي 100% تخفيضات كبيرة جدًا في أسعار العربيات الجديدة، لدرجة إن في عربيات نزلت 400 ألف جنيه مرة واحدة! آه والله.. السوق اللي كان مولع نار بقاله شهور، فجأة بدأ يهدى.
وشركات كتير أعلنت عن أسعار جديدة لعربياتها، سواء البنزين أو الكهربا، عشان تحرك السوق اللي كان نايم بسبب الأسعار اللي طلعت فوق السحاب.
من ضمن العربيات اللي نزلت هي نيسان صني، اللي نقدر نقول إنها أكتر عربية المصريين حافظين شكلها عن ظهر قلب، من كتر ما منتشرة في الشوارع.
الشركة أعلنت إن الفئة المانيوال من صني فضلت زي ما هي عند 645 ألف جنيه، لكن الجميل بقى إن الفئة الأولى أوتوماتيك نزلت لـ695 ألف بدل 745 ألف، والفئة التانية بقت 745 ألف بدل 780 ألف، أما الفئة التالتة الأعلى تجهيزًا فسعرها بقى 795 ألف بدل 810 ألف.
يعني اللي كان نفسه يجيب عربية نيسان جديدة بس كان خايف من السعر، دلوقتي ممكن يعيد التفكير.
تاني عربية نزل سعرها نزلة جامدة هي سمارت رقم 1، ودي عربية كهربا بتتباع في مصر من فترة قصيرة، لكن الشهر ده بقى اسعارها نزلت نزلة محترمة جدًا.
الفئة الأولى بقت مليون و490 ألف بدل مليون و890 ألف، والفئة التانية مليون و840 ألف بدل 2 مليون و140 ألف، أما الفئة التالتة فبقت مليون و990 ألف بدل 2 مليون و290 ألف،والفئة الأخيرة نزلت لـ2 مليون و140 ألف بدل 2 مليون و440 ألف.
يعني في فرق يوصل لـ400 ألف جنيه في بعض الفئات، وعلى فكرة العربية دي كهربا بالكامل، وقوتها عالية جدًا، ومداها في السواقة ممكن يوصل لـ440 كيلو من غير شحن.
نروح بقى لـ نيسان سنترا،العربية اللي ناس كتير بتعتبرها "ابن البلد" في الفئة المتوسطة،نزل سعرها الجديد للفئة الأعلى تجهيز 899 ألف بدل 1,020,000 جنيه.
ودي عربية مجمعة محليًا، يعني قطع غيار متوفرة وصيانتها سهلة،وده اللي مخليها من أكتر العربيات المحبوبة في السوق المصري.
أما نيسان جوك، فدي العربية اللي شكلها غريب شوية ومحبوبة من الشباب.الشركة أعلنت إن الأسعار الجديدة بدأت من مليون و75 ألف بدل من مليون و95 ألف.
والفئة التانية مليون و175 ألف بدل من مليون و195 ألف، أما الفئة الأعلى تجهيز نزلت بمليون و225 ألف بدل من مليون و245 ألف.
صحيح الفرق مش كبير، لكنه خطوة بتقول إن السوق بدأ يتحرك في الاتجاه الصح.
بعد كده نروح للعربية اللي بتعتبر أخت سمارت رقم 1، اللي هي سمارت رقم 3، ودي برضه كهربا بالكامل، بس أكبر وأقوى شوية.
الوكيل أعلن تخفيض ثابت بقيمة 300 ألف جنيه على كل الفئات.يعني الفئة الأولى بقت بمليون 990 ألف بدل من 2 مليون و290 ألف والتانية بـ2 مليون و190 ألف و490 ألف، أما الفئة الأخيرة الرياضية نزلت بـ2 مليون و390 ألف بدل من 2 مليون و690 ألف.
ودي عربية بقى مختلفة فعلًا… مش بس في السعر، لكن في الأداء كمان،لأنها عربية قوية جدًا وسريعة ومدى السواقة بتاعها يوصل لـ500 كيلو في الشحنة الواحدة.
بعد كده عندنا نيسان قشقاي،العربية اللي كل الناس بتتكلم عنها اليومين دول، واللي بقت من أكتر العربيات المطلوبة لأنها بتجمع بين الشكل العصري والتكنولوجيا.
الأسعار الجديدة ليها نزلت من مليون و499 ألف إلى مليون و464 ألف للفئة الأولى، وكل فئة نزلت في حدود 30 أو 40 ألف تقريبًا وفي منها كمان نسخ هجينة "هايبرد"، اللي بتشتغل بنزين وكهربا في نفس الوقت، ودي كمان نزل سعرها لمليوم و884 ألف بدل من مليون 919 ألف.
يعني موفرة في البنزين وسعرها كمان بقى أخف على الجيب.
أما آخر واحدة، فهي الكبيرة نيسان إكس تريل، العربية اللي تعتبر فخمة جدًا ومليانة تكنولوجيا حديثة.
الأسعار الجديدة نزلت من 2 مليون و199.990 ألف إلى مليون و999.999 ألف، يعني فرق حوالي 200 ألف جنيه في بعض الفئات.
العربية دي بقى فيها نظام جديد خالص في السواقة، الموتور البنزين بيشحن بطارية صغيرة، والبطارية دي بتشغل الموتور الكهربائي، وده بيخليها تمشي بسلاسة وتستهلك بنزين أقل، وكمان فيها نظام دفع رباعي كهربائي بيخلي العربية تتصرف في الطرق الصعبة بسرعة ودقة.
يعني لو بصينا كده على كل اللي حصل، هنكتشف إن سوق العربيات في مصر بدأ فعلاً يدخل مرحلة جديدة.
الأسعار بدأت تراجع نفسها، والشركات بدأت تحس إن لازم ترجع الأسعار لمستوى الناس تقدر تشتري عنده.
