سر الأمان والتنمية.. شوف إزاي مصر كسبت من فيضانات سد النهضة؟

في الوقت اللي السودان بيغرق من فيضانات ضخمة جاية من سد النهضة والأمطار، مصر واقفة مطمّنة… ليه؟.. السر في قلعة الحماية الأولى: السد العالي.
السد مش بس بيحمينا من الفيضانات، لأ، كمان حول الزيادة دي في المياه لطاقة كهربا وصلت لأعلى مستوى من سنة فاتت.
البيانات الرسمية بتأكد إن السد العالي في أسوان شغّال بكفاءة 100%، وأنتج 2100 ميجاوات كهربا — ودي أقصى طاقة إنتاجية ليه — لأول مرة من السنة اللي فات.
والزيادة دي في الكهرباء جاية من زيادة تصريف المياه بسبب فيضان السودان وتدفقات سد النهضة.. النتيجة: إنتاج الكهربا من السد ارتفع بنسبة 10%، وده جاي مع خطط الحكومة لزيادة قدرة السد لـ2400 ميجاوات عن طريق تغيير 12 محوّل، و2 منهم هيتغيروا قبل نهاية السنة.

د. حسين العطيفي، وزير الري الأسبق، طمّن المصريين وقال: مفيش داعي لأي قلق من الفيضانات اللي جاية من لسودان
ليه؟.. لأن السد العالي عنده سعة تخزين مهولة 162 مليار متر مكعب، وكمان بحيرات جانبية حوالي بحيرة ناصر بتاخد 22 مليار إضافية، غير مفيض توشكى اللي يقدر يصرف 20 مليار متر مكعب لو احتجنا.
وعباس شراقي، أستاذ الجيولوجيا والموارد المائية، أكد إن السد العالي استوعب أكتر من 700 مليون متر مكعب الشهر اللي فات من مياه جاية من السودان وسد النهضة، وكل ده بيتم تمريره من خلال التوربينات لتوليد كهربا وتنظيم الاستخدام اليومي.