الدنيا مقلوبة في أمريكا والناس مرعوبة.. إيه حكاية الإغلاق الحكومي اللي بيهدد مصالح الأمريكيين
هو إيه الحكاية اللي شغّالة في أمريكا اليومين دول؟ يعني إيه "إغلاق حكومي"؟! وهل معنى كده إن الدولة هناك هتقفل أبوابها والناس مش هتنزل شغل؟!
ولا الموضوع له معنى اقتصادي وسياسي أعمق؟ وليه الكونجرس والحكومة مش قادرين يتفقوا على ميزانية بلد بحجم الولايات المتحدة؟ والأهم.. الإغلاق ده بيأثر إزاي على حياة المواطن الأمريكي العادي؟
أزمة الإغلاق الحكومي قالبة الدنيا في أمريكا ومسببة دوشة في الإعلام والأسواق.. وأول حاجة لازم نفهمها "الإغلاق الحكومي" معناه إن الحكومة الفيدرالية الأمريكية بتوقف جزء كبير من خدماتها وتمويل أنشطتها، والسبب إن الكونجرس – اللي هو البرلمان الأمريكي – مش قادر يوافق على قانون الموازنة أو على تمويل مؤقت لتسيير الأمور..بمعنى أوضح الحكومة معندهاش فلوس تصرف، لأن ببساطة القانون مش متوافق عليه.
طب ده بيأثر على مين؟
ملايين الموظفين ممكن يتوقف شغلهم أو يشتغلوا من غير مرتبات لحد ما الأزمة تتحل..كمان الخدمات العامة هتتاثر زي المتاحف، الحدائق الوطنية، بعض مكاتب الجوازات والتأشيرات.. ممكن تتقفل.. وطبعا ده غير الخساير الاقتصادية.. لأن أي تعطيل في أكبر اقتصاد في العالم بيهز الأسواق العالمية ويأثر على الاستثمارات والدولار نفسه.
طب ليه الإغلاق ده حصل؟
الأزمة سياسية بامتياز الحزب الجمهوري والحزب الديمقراطي مش قادرين يتفقوا على حجم الإنفاق وأولويات الصرف.. الجمهوريين مثلًا بيضغطوا على تقليل الإنفاق الحكومي خصوصًا في ملفات زي الهجرة والمساعدات.. بينما الديمقراطيين عايزين يحافظوا على برامج الرعاية الاجتماعية والإنفاق الداخلي.
الخناقة دي بتوصل لطريق مسدود، ولأن أمريكا عندها نظام بيجبر الكونجرس يوافق على أي صرف حكومي، فلو مفيش اتفاق .. مفيش تمويل =.. يعني إغلاق حكومي
طب هل دي أول مرة يحص اغلاق؟
لأ طبعا.. أمريكا عندها تاريخ طويل مع الإغلاقات الحكومية.. من سنة 1976 لحد النهارده حصل أكتر من 20 مرة إغلاق أو تعطيل مؤقت للحكومة.
أشهرهم وأطولهم كان في 2018-2019 وقت إدارة ترامب، واستمر 35 يوم، وكان بسبب تمويل الجدار الحدودي مع المكسيك
طيب التداعيات إيه المرة دي؟
لو الإغلاق طول، الموظفين هيتضرروا جدًا، الاستهلاك هيقل، النمو الاقتصادي ممكن يتأثر، حتى تصنيف أمريكا الائتماني ممكن يتعرض لضغط، وده هيهز ثقة المستثمرين.
لكن في نفس الوقت، الإغلاق مش معناه انهيار كامل. في خدمات أساسية بتكمل زي الأمن القومي، الجيش، المستشفيات الحرجة. يعني الدولة مش "بتقف"، لكنها بتتعطل بشكل كبير ومزعج
المثير إن الإغلاق الحكومي بقى ورقة ضغط سياسية، كل حزب بيحاول يكسب بيها نقاط على حساب التاني، لكن الضحية في الآخر هو المواطن الأمريكي اللي بيتأخر مرتبه أو بيلاقي خدمة حيوية اتقفلت
