لأول مرة منذ 17 سنة.. مصر حققت اكتفاء ذاتي وبقت تصدر فراخ والمليارات من البيض.. عملنا كده ازاي!
لأول مرة منذ 17 سنة.. مصر تحقق الاكتفاء الذاتي وبقت من الدول المصدر الفراخ وبتنتج مليارات من البيض!
لو قلتلك إن مصر دلوقتي بقى عندها اكتفاء ذاتي تماما من الفراخ والبيض والألبان الطازة هتصدق، طب لو قلتلك إننا مش بس كده لا ده إحنا كمان ابتدينا نصدر لأول مرة من ١٧ سنة.
الموضوع ماجاش كده صدفة ده ورا منه شغل تقيل وخطة طويلة ومشروعات شغالة على الأرض واللي ورا الحكاية دي وزارة الزراعة اللي بقالها سنين بتحفر في الصخر علشان نوصل للي إحنا فيه
الموضوع كله قايم على 3 مشروعات قومية كبار أولهم مشروع البتلو اللي فكرته ببساطة إننا ما نذبحش العجل الصغير بدري وندي فرصه يكبر ويتسمّن وعلشان ده يحصل وفروا تمويلات سهلة لصغار المربين بدأوا بمية مليون جنيه في ٢٠١٧ والنهاردة الرقم وصل لأكتر من تسعة مليار وثلاثمية مليون وده ساعد أكتر من ٤٤ ألف مستفيد يربوا نص مليون رأس ماشية في قرى حياة كريمة
تاني مشروع كان التحسين الوراثي يعني إيه يعني يخلّوا البقر المصري يخلّف عيال إنتاجها أعلى ومناسبة لجو مصر يعني يجيبوا سلالات أجنبية ويخلطوها مع المحلية وتطلع النتيجة سلالات مصرية مطورة تتحمل الجو وتنتج لبن ولحمة أكتر.
تالت مشروع تطوير مراكز تجميع الألبان وده باختصار خلى اللبن اللي بيطلع من الفلاح يوصل بشكل آمن ونضيف للمصانع النهاردة بقى عندنا ٢٩٦ مركز نموذجي لتجميع اللبن منهم ٤١ مركز في قرى حياة كريمة يعني كل نقطة لبن بقت محسوبة وبتروح في مكانها الصح.
وده مش بس كده المنظمة العالمية للصحة الحيوانية اعتمدت ١٤ مزرعة لبن في مصر إنها خالية من أمراض زي الدرن والبروسيلا يعني معترف بينا رسميًا وده نجاح لوحده.
نيجي بقى للفراخ القرار الجمهوري اللي طلع علشان يفتح الاستثمار الداجني في الصحرا بدأ يجيب نتيجته فعليًا اتعملت مشروعات واتعاملت بروتوكولات بين الحكومة والبنوك واتحاد منتجي الدواجن علشان نساعد الناس تحوّل مزارعها من النظام المفتوح للنظام المغلق وده فرق جامد في الإنتاج والتكلفة وكمان قلل الأمراض وزود العائد.
نتيجة الكلام ده إن بقى عندنا ٤٠ منشأة داجنة معزولة يعني مؤمنة وقادرة تصدر وبالفعل ابتدينا نصدر لأول مرة من ١٧ سنة وسجلنا كمان منشآت تانية ولسه فيه شغل بيتعمل على ده.
تخيل بقى حجم الاستثمارات في صناعة الفراخ وصل لأكتر من ١٠٠ مليار جنيه وبننتج ١.٤ مليار طائر من القطاع التجاري و٣٢٠ مليون من القطاع الريفي يعني إحنا بنغطي ٩٧٪ من احتياجاتنا وبيض المائدة وصل ١٤ مليار بيضة في السنة وكله إنتاج محلي.
والصناعة دي بتشغّل حوالي ٣.٥ مليون بني آدم في مصر وكل فرد بيستهلك تقريبًا ٢٠ كيلو فراخ و١٤٠ بيضة في السنة.
من ناحية تانية وزارة الزراعة عملت حصر شامل ودقيق إلكتروني لثروتنا الحيوانية والداجنة وبقى عندنا قاعدة بيانات وخريطة كاملة نعرف منها كل حاجة فين وإيه ونقدر ناخد قرارات بسرعة وسهولة.
عدد تراخيص التشغيل بقى أكتر من ١٢٥ ألف بعد ما كانوا ألف وخمسمية بس في ٢٠١٧ وكمان سهلوا التمويل لصغار المربين واستثنوهم من التعقيدات القانونية وركزوا على رقابة الأعلاف ومنع الغش وبيشتغلوا على مدار اليوم من غير توقف
كمان المعهد اللي بينتج لقاحات الدواجن زوّد الإنتاج من ٢٠٠ مليون لـ١.٥ مليار جرعة وبيوفروا اللقاحات في كل محافظة حسب الكثافة وبيرفعوا كفاءة الوحدات البيطرية وبيطلعوا قوافل علاجية مجانية للفلاحين فيها فحص وتلقيح وكل حاجة.
ومراكز التلقيح الصناعي زي سخا والعامرية وبني سويف اتطورت واتدعمت بأجهزة حديثة وسلالات محسنة وكمان الحكومة شالت الضريبة العقارية عن مشاريع الفراخ والماشية وشالت الضريبة المضافة على خامات الأعلاف.
غير كده صدر قرار وزاري بوجوب الإشراف البيطري على مزارع الفراخ والماشية علشان نضمن رعاية صحية محترمة وآمنة.
والنتيجة إننا حققنا الاكتفاء الذاتي من الفراخ وبيض المائدة والألبان ومش بس كده ده إحنا بنصدر كمان واللي جاي أحسن.
