خطوة جديدة لمصر لتصدير الكهرباء إلى أوروبا عبر اليونان.. شوف إيه اللي بيحصل
خطوة جديدة أخذتها الدولة لزيادة إيرادات مصر من قطاع مهم جدا وهو الكهرباء ..ياتري اية هيا الخطوة دي .. ومنين الإيرادات اللي هتحققها مصر من صادرات الكهرباء... وازاي مصر هتصدر الكهرباء وهيا بتقطع عندنا.
الدولة في الوقت الحالي شغالة علي خطة مهمة جدا وباب جديدة للصادرات واللي هتكون إيراداتها بالدولار، والخطة دي من قطاع الكهرباء واللي الدولة مستهدفة انها تصدر منها كميات كبيرة وهتكون إيراداتها كلها بالدولار، ويوم ورا التاني الدولة بتاخذ خطوات فعلية علشان تفعل خطة تصدير الكهرباء الكهرباء للخارج.
طيب إزاي مصر هتصدر كهرباء للخارج واحنا عندنا نقص في الإنتاج وقطع في التيار ؟.
مصر في الوقت الحالي عملت خطة لزيادة إنتاجية التيار من محطات، وفتحت الباب قدام شركات القطاع الخاص والاستثمار الأجنبية للدخول للسوق المصري، وكانت أول خطوة عملتها الدولة كانت تعديل التشريعات وإصدار قانون الكهرباء الجديد واللي تضمن بنود بتسمح بدخول الشركات الأجنبية والقطاع الخاص للشراكة في بناء وتشغيل محطات توليد الكهرباء من مصادر الطاقة المتجددة واللي هيا مصادرها الأساسية الشمس والهواء.
قرارات الدولة لتحفيز شركات القطاع الخاص والاستثمارات الأجنبية لسوق الكهرباء في مصر، واللي تضمنت تحفيزات وتسهيلات كبيرة للشركات الأجنبية من تخصيص الأراضي اللازمة لإقامة وبناء محطات توليد الكهرباء من الشمس والهواء وكمان الحكومة اشترطت أنها تشتري الكهرباء اللي هتنتجها الشركات الأجنبية العاملة في مصر وفي نسبة من إيراداتها هتكون بالدولار والنسبة التانية هتكون بالجنية المصري.
التحفيزات اللي قدمتها الحكومة لشركات القطاع الخاص والاستثمارات الأجنبية خلت عدد كبير من الشركات تقدم رغبة لدخول السوق المصري، خصوصا أن مصر عندها مساحات كبيرة صالحة لإقامة محطات توليد الكهرباء من الهواء والشمس خصوصا في أسوان بالنسبة لمحطات الطاقة الشمسية، وعلي سواحل البحر الاحمر والضبعة بالنسبة لمحطات توليد الكهرباء من طاقة الرياح، وده اللي خلي مصر توصل لتحقيق أكثر من 2000 ميجاوات جديدة من طاقات الشمس والرياح في وقت قصير قوي.
توسعات الدولة في محطات الطاقة الجديدة والمتجددة مش واقف علي محطات الهواء الشمس بس، ده غير كمان شغل تاني بيتعمل في محطات طاقة متجددة في منطقة الضبعة واللي بيتعمل فيها معجزة اسمها محطة الضبعة النووية لتوليد الكهرباء واللي هتولد نسبة كبيرة من الكهرباء اللي بتحتاجها مصر بإجمالي 4800 ميجاوات من 4 مفاعلات هيتم تشغيلهم تباعا من 2029.
طيب اية اللي بتعمله مصر مع اليونان ؟
مصر ممثلة في وزارة الكهرباء والطاقة المتجددة وقعت اتفاق تعاون مع اليونان لإنهاء الدراسات الفنية والاقتصادية لمشروع الربط الكهربائي بين البلدين بطاقة هتوصل لـ3000 ميجاوات، والخط ده هيكون بداية لشبكة كبيرة مصر بتوي تشغيلها لتصدير الكهرباء الي أوروبا.
