الأربعاء 01 أكتوبر 2025
رئيس التحرير
عمرو عامر
رئيس التحرير التنفيذي
أحمد لطفي
رئيس التحرير
عمرو عامر
رئيس التحرير التنفيذي
أحمد لطفي
اقتصاد مصر

كيف تدعم محطة الضبعة النووية الاقتصاد القومي المصري؟

الأربعاء 01/أكتوبر/2025 - 11:00 ص
محطة الضبعة النووية
محطة الضبعة النووية

مصر بتنفذ حاليا اكبر محطة نووية تحت الانشاء في العالم وبتعتبر مشروع قومي ضخم.

مش بس في مجال الكهرباء لكن كمان في دعم الاقتصاد وتوفير الطاقة النظيفة وفرص العمل وفتح مجالات جديدة لاستخدام الغاز الطبيعي.

لكن ياترى ايه مردود المحطة على اقتصاد مصر القومي .. ده اللي هنعرفه مع بعض.

المحطة بتتكون من 4 مفاعلات نووية قدرة الواحد 1200 ميجا وات بإجمالي 4800 ميجا وات وده معناه ان مصر هتنتج حوالي 35 مليار كيلو وات ساعة سنويا وكمان هتوفر 7 مليارات متر مكعب غاز طبيعي كان بيتحرق في محطات الكهرباء التقليدية.

الميزة الاكبر للمشروع انه بيوفر كهرباء نظيفة من غير اي انبعاثات وبيصنف كطاقة مستدامة وده هيساعد مصر تستخدم الغاز في الصناعات البتروكيماوية اللي قيمتها الاقتصادية اعلى وده يساهم في زيادة الصادرات وجذب استثمارات جديدة.

كمان خليني اقولك إن فيه اكتر من 600 شركة مشاركة في تنفيذ الضبعة منهم 25% شركات مصرية ونسبة العمالة المحلية وصلت 80% وده بيعكس دور المشروع في بناء خبرات وطنية كبيرة في قطاع الطاقة النووية.

التنفيذ بيتم بالتعاون مع شركة روساتوم الروسية ومن المقرر ان المحطة تبدأ التشغيل سنة 2029 وفي نوفمبر اللي جاي هيتم تركيب وعاء المفاعل الاول ودي خطوة اساسية بتأكد ان مصر ماشية بخطة واضحة لتنفيذ المشروع في مواعيده.