مشروع العمر اللي هينقل مصر في حتة تانية.. تعاون مختلف مع القطاع الخاص
يا ترى ايه حكاية الـ 300 ألف فدان اللى مصر ناوية تضيفهم للرقعة الزراعية.. وإيه علاقة الأرض الجديدة دي برغيف العيش؟ وهل الأراضي دي هتقلل فاتورة الاستيراد وتوفر دولار؟
في خطوة جريئة ومهمة.. مصر بتستهدف إضافة أكتر من 300 ألف فدان للرقعة الزراعية بنهاية السنة المالية دي.. المساحات دي هيتم استصلاحها بالتعاون بين الحكومة والقطاع الخاص.. لإن الموضوع كبير ومحتاج مجهود مشترك.
حد يسأل و إيه الهدف من الموضوع ده كله؟
الهدف هو إننا نركز على المحاصيل الاستراتيجية.. زي القمح بالذات.. اللي هو أساس أكلنا.. لإن كل ما بنزرع قمح أكتر.. بنقلل استيرادنا ليه من بره.. وبنوفر مليارات الدولارات اللي كانت بتتصرف على الفاتورة دي.
الخطة دي مش وليدة اللحظة.. مصر نجحت في إنها تضيف 3.5 مليون فدان للرقعة الزراعية في التلات سنين اللي فاتوا.. وده مجهود ضخم جداً.. لإن المساحة الزراعية في مصر حالياً حوالي 9.5 مليون فدان.. منها 3.1 مليون فدان مزروعة بالقمح.. و725 ألف فدان بنجر.. و500 ألف فدان بطاطس.
طب الموضوع ده هيكلف كام؟
استصلاح الفدان الواحد بيكلف حوالي 350 ألف جنيه.. ده غير تكلفة كل بير مياه.. اللي ممكن توصل لـ 7 مليون جنيه.. يعني التكلفة الإجمالية لاستصلاح الـ 300 ألف فدان دي ممكن تتجاوز 105 مليار جنيه.. ده رقم ضخم جداً.. لكنه استثمار أساسي ومصيري في الأمن الغذائي للبلد.
عشان تنجح الخطة دي.. الحكومة أخذت خطوات مهمة.. زي إنها رفعت أسعار توريد القمح لموسم 2025-2026.. عشان تشجع الفلاحين يزرعوا قمح أكتر.. وكمان رفعت أسعار توريد قصب السكر والبنجر.. كل ده بيشجع الفلاحين على زراعة المحاصيل الاستراتيجية دي.. وده بيضمن إننا نلاقي المحاصيل دي في السوق بكميات كبيرة.
المشروع ده مش مجرد أرقام.. ده حلم .. حلم الاكتفاء الذاتي من أهم المحاصيل اللي بناكلها كل يوم.. ده حلم إننا نوفر دولار.. ونخلي الاقتصاد المصري أقوى.. ده حلم إننا نسيطر على أسعار الأكل.. ومتبقاش مرتبطة بأسعار الدولار في السوق العالمي.
