مفيش إضافة مواليد و4 فئات هتتحرم.. إيه اللي بيحصل في ملف بطاقات التموين؟
الناس كلها فرحت لما وزارة التموين أعلنت عن فتح الباب لتحديث البيانات.. والكل افتكر إن في إضافة مواليد دلوقتي.. لكن الموضوع في تفاصيل كتير جدًا.. في ناس هتتشال؟.. وناس جديدة هتضاف؟.. طب إيه اللي بيحصل؟.. ومن الفئات اللي هتتحذف ومين اللي هيدخل.
وزارة التموين قالتها بصوت عالي اللي بيحصل حاليًا هو "تحديث بيانات"... مش "إضافة المواليد".
بس.. التحديث ده مهم جدًا، لأنه ممكن يخرج ناس من التموين.. وفي نفس الوقت، يفتح الباب لناس جديدة تدخل
إيه اللي بيحصل دلوقتي؟
الوزارة بدأت من إمبارح الأحد تحديث بيانات المواطنين المستحقين للدعم من خلال موقع مصر الرقمية والبداية من محافظة بورسعيد.
والغرض واضح جدًا: نضف المنظومة. نتأكد إن كل مستفيد فعلاً محتاج. ندي فرصة لناس تانية تستحق تدخل الدعم.
التحديث ده هيشيل مين؟
وزارة التموين وضحت إن في 4 فئات هيتم استبعادهم خلال عملية التحديث:
1- الناس اللي بياناتهم غلط
زي رقم قومي غير صحيح، أو بيانات مش متسجلة صح.
2- المتوفين
ناس اتوفوا ولسه البطاقة بتصرف ليهم دعم
3- أفراد مالهمش علاقة بصاحب البطاقة
يعني مش زوج أو زوجة أو أولاد، لكن مضافين من زمان ومفيش صلة قرابة.
4- الناس اللي عايشين برة مصر لفترة طويلة
دول مش بيستهلكوا التموين جوه البلد، فمش من العدل يفضلوا ياخدوا دعم.
وخلي بالك: مالكي السيارات مش ضمن الفئات اللي بتتشال في المرحلة دي.
طب بعد الحذف مين اللي ممكن يدخل التموين بعد التحديث؟
الدكتور محمد شتا، مساعد وزير التموين، قال إن التحديث ده هيوسع "دائرة الاستحقاق"، يعني في ناس جديدة ممكن تدخل لو بياناتهم بتقول إنهم يستحقوا.
والفئات اللي ممكن تستفيد في المرحلة الجاية:
أسر "تكافل وكرامة": لو معاك كارت تكافل وكرامة، هتقدر تضيف أولادك بسهولة. وأصحاب كارت الخدمات المتكاملة: يعني لو عندك فرد من ذوي الاحتياجات الخاصة، وتملك الكارت ده. أبناء الشهداء وزوجة الشهيد، وبعض الأسر الأولى بالرعاية.
الوزارة هتحدد الناس وفقًا لشروط معينة زي عدد أفراد البطاقة والدخل. الوزارة كمان حددث شروط عامة للإضافة، منها عمر الطفل لا يقل عن 4 سنين، الحد الأقصى لأفراد البطاقة: 4 أفراد (زوج، زوجة، و2 أبناء)، لو عندك 3 بس، تقدر تضيف رابع لو من الفئات المستحقة.
الهدف الأساسي دلوقتي تحديث بيانات المواطنين وفق المتغيرات الاجتماعية والاقتصادية، ضمان استمرار الدعم للناس المستحقة، فتح الباب قدام أسر جديدة تنضم في المستقبل.
الحكومة مش هتقطع التموين من غير سبب، بس بتحاول توصله لمستحقيه الفعليين.. ولو انت منهم، حافظ على بياناتك محدثة، ولو لك حق في الإضافة، اغتنم الفرصة أول ما تتاح.
