مصر تبني مدينة في الصعيد هتغير شكل الصناعة.. إيه الحكاية؟

كل الأنظار رايحة على المنيا.. مدينة جديدة بتتبني، بس مش زي أي مدينة. مدينة صناعية متكاملة للملابس والمنسوجات هتغير شكل الصناعة في مصر  "اسمها وادي سريرية.". إيه حكاية المدينة دي؟.. وليه المنيا؟.. وحجم الاستثمارات قد إيه؟

وادي سريرية مش مجرد حلم، ده مشروع صناعي ضخم هيفرق في خريطة الصناعة المصرية.. خصوصًا في الصعيد.

استثمارات صينية جديدة تطرق أبواب المنطقة الاقتصادية لقناة السويس لتعزيز صناعة المنسوجات

هجوم تركي على مصر في قطاع صناعة المنسوجات والملابس الجاهزة.. شوف ايه الحكاية

مشروع مدينة وادي سريرية للملابس الجاهزة والمنسوجات في محافظة المنيا، هو أول مدينة صناعية متكاملة من نوعها في الصعيد.

مساحة المشروع حوالي 5.5 مليون متر مربع (يعني حوالي 1310 أفدنة) مع إمكانية التوسع إلى 22 ألف و500 فدان بعد كده، وبيستهدف جذب استثمارات بقيمة 1.5 مليار دولار.

ما يميز وادي سريرية إنها مش بس مصانع وخلاص، لأ، فيها: سلسلة إنتاج متكاملة من الغزل، النسيج، الصباغة، المفروشات، والملابس الجاهزة. وبنية تحتية جاهزة (كهرباء، مياه، صرف، اتصالات) تتيح التشغيل فورًا. 

موقع استراتيجي: شرق النيل، قريب من الطرق والمحاور الكبرى، وميناء سفاجا على البحر الأحمر — ده بيسهل التصدير ويقلل تكاليف الشحن. والهدف؟ توطين الصناعة، خلق فرص عمل، وتقليل الاستيراد وزيادة التصدير.

طيب فين مصر من الصناعة دي أصلًا؟ صناعة الملابس والمنسوجات بتشكّل حاليًا حوالي 2.8 مليار دولار صادرات سنويًا.

والهدف نوصل لـ 12 مليار دولار قبل 2030. ده معناه إن في خطة فعلية لمضاعفة الإنتاج والتصدير خلال كام سنة. ومش بس في المنيا، فيه مدينة نسيجية تانية بتتجهز في شمال الفيوم، بنفس المساحة تقريبًا، لتكملة سلسلة الإنتاج.

الرسالة واضحة: مصر مش بس بتبني مصانع، دي بتبني منظومة تصنيعية كاملة علشان ترجع تتصدر سوق النسيج عالميًا.

وادي سريرية لوحدها متوقع توفر حوالي 400 ألف فرصة عمل مباشرة و250 ألف غير مباشرة، و60% من فرص التشغيل دي مخصصة للسيدات، في نقلة حقيقية لتمكين المرأة في سوق العمل.

وادي سريرية مش بس مشروع، ده خطوة استباقية لبناء اقتصاد تصديري قوي، لتوفير فرص حقيقية، ولتوطين الصناعة، وخطوة لإحداث تغيير حقيقي في الصعيد.