ارتفاعات جنونية في الأسعار.. شوف ليه أسعار الذهب في مصر وصلت لـ 4900 جنيه
ارتفاعات جنونية في أسعار الذهب العالمي والأوقية سجلت اعلي سعر لها في التاريخ.. يا ترى إيه تأثير الارتفاع العالمي في أسعار المعدن الأصفر علي الأسعار في مصر.. وامتى سعر الجرام 21 هيوصل لـ 5 آلاف جنيه.
الشارع المصري في الوقت الحالي كله بيتكلم عن أسعار الذهب، والارتفاعات الكبيرة اللي حصلت في أسعار الأعيرة، وكل الناس بتسأل عن الأسباب اللي وصلت الأسعار للأرقام دي، وهل الأسعار هتفضل مكملة في الارتفاع كده علي طول ولا هيكون في إنخفاض من جديد، وإمتى جرام الذهب عيار 21 واللي هو الأكثر مبيعا وانتشارا في مصر هتوصل لـ 5 آلاف جنيه.
طيب اية الأسباب اللي خلت أسعار الذهب ترتفع للأرقام دي وهل أسعار الذهب هتفضل مكملة في ارتفاعاتها كده في مصر؟
في البداية لازم نكون عارفين ان سعر الدهب مش بيتحدد في مصر بس، لأ ده بيتأثر بحاجات بتحصل في العالم كله، وطبعا في حدث بيشتغل بال الناس كلها أو اجتماع البنك الفيدرالي الأمريكي لحسم الفائدة، وده معناه إن الدولار هيبقى أضعف، وساعتها الناس هتجري تشتري دهب علشان يحافظ على فلوسهم، ده غير أن العالم كله عايش في حالة قلق بسبب الحروب التوترات الجيوسياسية والاقتصادية اللي موجودة بين عدد كبير من دول العالم.
التوترات الجيوسياسية والاقتصادية والقرار المتوقع للبنك الفيدرالي الأمريكي بخفض أسعار الفائدة عملت خسائر كبيرة في اسعار الدولار واللي سعره خسر تقريبا 10% من قيمته السنة دي، وده بيخلي الدهب أرخص للمستثمرين عالميا، ده غير أن في التدخلات السياسية اللي موجودة حاليا من مسئولي البيت الأبيض في قرارات البنك المركزي الأمريكي، وده بيخلي الناس تفضل الدهب كأمن بديل عن الثقة عن الدولار، وده اللي دفع عدد كبير من البنوك المركزية في أغلب الدول زي الصين والهند وروسيا وتركيا بيكثفوا شراء الذهب علشان يقللوا اعتمادهم على الدولار ويحافظوا على احتياطياتهم.
أسعار الذهب في مصر طول عمرها بتكون انعكاس للأسعار العالمية، وسعر الدهب العالمي لما يعلى السعر في مصر اتوماتيك بيعلي معاه، ده غير أن في تغييرات كبيرة حصلت في سعر صرف الجنية المصري علي مدار السنين اللي فاتت واللي كان لها تأثيرات مباشرة علي أسعار المعدن الأصفر، خصوصا القرارات الأخيرة بتقليل سعر الفائدة، واللي خلت اغلب الناس تحول فلوسها من الاستثمار في الشهادات الي الذهب.
كل المؤثرات دي خلت أسعار الذهب خصوصا عيار 21 واللي هو الأكثر مبيعا في مصر ترتفع الي أكثر 4900 جنيه ولسه الأسعار مرشحة للإرتفاع من جديد ومتوقع أنه توصل لأكثر من 5000 جنية خلال وقت قريب جدا، ودي هتكون المرة الثانية جرام الذهب يعدي 5000 جنية في التاريخ، ده غير أن الإستثمار في العقارات في الوقت الحالي بقت مجازفة غير محمودة العواقب بسبب الفقاعة العقارية اللي بيعاني منها السوق المصري، ده غير أن الإستثمار في العقارات محتاج ارقام كبيرة جدا.
