بعد رأس الحكمة ومراسي.. جهود مصرية لزيادة الاستثمارات السياحية
في تركيز كبير من الحكومة حاليا علي صفقات الاستثمار السياحي زي اللي حصل في رأس الحكمة والمرة دي مراسي البحر الاحمر.. ياتري إيه سر اهتمام الدولة والنوعية دي من المشروعات.. والدولة بتستهدف منها ايه.
تعزيز الاستثمار واحد من الأهداف المهمة جدا اللي الحكومة شغالة عليها في الوقت الحالي، خصوصا المشروعات الاستثمارية التنموية زي اللي حصل في رأس الحكمة، واللي كانت عبارة عن نقله اقتصادية كبيرة في الوقت الحالي بدخول 35 مليار دولار كايرادات في البنك المركزي، ده غير الإيرادات المتوقعة مع بداية تشغيل المشروع، وفرص العمل الكتيرة اللي هيوفرها للدولة سواء بشكل مباشر أو غير مباشر مع التشغيل الفعلي.
توقيع مصر صفقات الاستثمار السياحي في رأس الحكمة فتح نفس الحكومة علي انها تكررها، المرة دي الدولة وقعت عقود واحد من أكبر المشروعات السياحية في البحر الاحمر وهو مشروع مراسي البحر الاحمر واللي اتوصف أنه هيغير خريطة الاستثمار السياحي في منطقة البحر الاحمر بالكامل.
طيب اية هيا خطة لتوسع الاستثمارات السياحية وأهدافها منها ؟.
لازم تكون عارفين ان مشاريع راس الحكمة ومشروع مراسي مش محرم مشاريع ترفيهية علي قد ما هيا وراها أهداف اقتصادية كبير، خصوصا أنها تحولت لباب رئيسي للدخل الدولاري وهيا اللي كانت السند الحقيقي للدولة المصرية في أزمة نقص العملات الأجنبية، والفلوس دي ساعدت البنك المركزي أنه يتحكم في سعر الصرف، والناس بدأت تحس إن الجنيه بيستقر شوية، ده غير أن المشاريع دي خلقت فرص عمل كتيرة للشباب سواء كانت يشكل مباشر أو غير مباشر.
في أكثر من ميزة رجعت علي مصر من المشروعات دي، خصوصا أنها عطت انبطاع للمستثمرين في الخارج عن الاستقرار اللي موجود عليه الاقتصاد المصري، وده لسبب بسيط جدا هو أن مفيش مستثمر هيدخل يرمي فلوس في دولة ملهاش استقرار ولا ضامن مشروعه هيستقر ولا لا، وبالتالي التوعية دي من المشروعات عملت سمعه كويسة جدا للأمن والأمان واستقرار البرنامج الاقتصادي المصري قدام العالم.
في نقطة مهمة جدا استفادت فيها مصر من مشروعات الاستثمار السياحي وهيا تحويل مناطق نايمة وغير مستغلة وحولتها لمدن سياحية هتدخل مليارات الدولارات لمصر سنويا، وده هيحول منطقة زي الساحل الشمالي واللي كان شغال بنسب محدودة في السنة لمدينة هيكون عليها اقبال سياحي من كل دول العالم علي مدار السنة، ده غير أننا بنعمل فيها حياة جديدة من مساكن ومدارس ومطارات وشغل مش بس سياحة، والدولة عندها خطط أنها تكرر التجربة في مدن كتيرة علي شواطئ البحر الاحمر والمتوسط.
اللي بيحصل ده جزء من خطة أكبر اسمها مصر 2052، والدولة عايزة فيها توزع السكان وتبني مدن جديدة بعيد عن الزحمة بتاعة القاهرة والدلتا.
