أكتر من 31 مليار دولار.. "بريكس" بيغذي الاقتصاد المصري بـ استثمارات جديدة
انضمام مصر لتكتل بريكس واحدة من أهم الخطوات الاقتصادية اللي أخذتها الحكومة علي مدار الشهور اللي فاتت..
يا ترى ليه مصر كانت عندها حلم الانضمام لتكتل بريكس.. وآية الفائدة اللي رجعت علي مصر منها.. وازاي مصر هتستفاد اقتصاديا مع علاقاتها مع الدول الأعضاء في التكتل.
من كام ساعة كان في مشاركة افتراضية للرئيس عبدالفتاح السيسي في القمة الاستثنائية لرؤساء الدول والحكومات الأعضاء في تجمع بريكس، واللي انعقدت بدعوة من البرازيل باعتبارها الرئيس الدوري الحالي للتجمع، واللي ناقش التحديات العالمية والأزمات الاقتصادية اللي بتواجه كل دول العالم.
طيب اية الاستفادة اللي رجعت علي مصر من الانضمام لتكتل بريكس؟.
في يونيو 2023، مصر قدمت طلب رسمي للانضمام الي تكتل بريكس، والطلب ده اتوافق عليه في بداية يناير 2024، خصوصا أن مصر بتعد تاني أكبر اقتصاد في إفريقيا وعندها كل الشروط اللي بتمكنها من الانضمام الي التكتل.
في أكثر من ميزة بترجع علي مصر من الانضمام الي تحالف بريكس أولهم خفض الاعتماد على الدولار، خصوصا أن التكتل بيشتغل على إنه يقلل اعتماد الاعضاء على الدولار من خلال عملة بديلة مدعومة، وده ممكن يساعد مصر في تجاوز أزمة نقص الدولار اللي عندها، ده غير أن هيوفر لمصر ميزة الحصول علي تمويلات بشروط مسيرة عن بنك التنمية الجديد، وده يفتح لها فرص تمويل أكبر وسهولة أكثر من المؤسسات الأجنبية
في نقطة كمان مصر هتستفاد فيها من انضمامها لتكتل بريكس، وهو الزيادة الكبيرة في الاستثمارات الموجودة في السوق المصري من الدول الأعضاء في التكتل. اللي ارتفعت من 611 مليون دولار في 2021 الي 891 مليون دولار بزيادة أكثر من 46%، ده غير أن التبادل التجاري مع دول التكتل ارتفع من 28.3 مليار دولار سنة 2021 لـ 31.2 مليار بزيادة حوالي 10.5%.
في حاجة مهمة كمان مصر هتسفاد فيها من الانضمام لتكتل البريكس، هو تأمين الاحتياجات الاستراتيجية، خصوصا أن أغلب واردات مصر من السلع الأساسية بتكون من دول أعضاء في التكتل زي روسيا والهند واللي بنجيب منهم سلع مهمة زي القمح والأرز واللي بعد انضمام مصر التكتل نقدر نستورد كل السلع اللي احنا عايزنها بالعملات المحلية زي الجنيه والروبل والروبية بدل الدولار، ده طبعا خفف الضغط علي الدولار، وساعد في ارتفاع احتياطات مصر النقدية من العملات الأجنبية.
البنود اللي علي أساسها قام عليها تكتل البريكس هتضيف لمصر ميزة مهمة كمان وهيا دعم الاحتياطي النقدي والحد من عجز الموازنة، خصوصا أن مصر في الوقت الحالي تقدر تستلف دولار من اي دولة من الدول الأعضاء في التكتل وتديها بدلا منه عملات محلية وده حل أزمة كبيرة جدا في مصر وهيا أزمة نقص العملات الأجنبية.
لازم تكون عارفين ان انضمام مصر لتكتل البريكس، خلي في ثقة كبيرة في المستثمرين في الاقتصاد المصري، وخلي مصر تظهر قدام العالم كله كدولة لها وزن إقليمي، وده كان عامل مهم من عوامل التحسن الحالي في سعر صرف الجنية المصري قدام الدولار، وكان سبب مباشر من أسباب الاستثمارات الكبيرة اللي بتنزل علي الأسواق المصرية.
