ملايين الدولارات في خزينة مصر.. 133% زيادة في صادرات مصر من الصناعات الغذائية للصين.. ما التفاصيل؟
صادرات مصر للصين قفزت قفزة كبيرة جدا، بس هل هنقدر نحافظ على معدل النمو الضخم ده في صادراتها للصين ولا هيكون طفرة مؤقتة؟.. وهل المنتجات المصرية قادرة تنافس المنتجات العالمية في الجودة والسعر قدام التنين الصيني؟.. وممكن نشوف صادرات الصناعات الغذائية المصرية توصل كام مليار دولار في 2030؟.
ممكن حد يصدق إن صادرات مصر من الصناعات الغذائية للصين بس زادت بنسبة 133% خلال أول 7 شهور من 2025؟، رقم ضخم جدًا بيدل قد إيه الحكومة مركزة على دعم القطاع ده، وقد إيه المصانع والشركات المصرية قدرت تفتح لنفسها أسواق جديدة وتحقق مليارات الدولارات الإضافية.
خليني أقولك إن الصين مش هي الدولة الوحيدة اللي حصل معاها نمو في صادراتنا، لكن الأرقام معاها ملفتة جدًا، لأن قيمة صادراتنا للصين وصلت لـ112 مليون دولار، يعني زادت 64 مليون دولار عن نفس الفترة من السنة اللي فاتت، وده نجاح يحسب للقطاع كله.
لو بصينا على باقي الدول، هنلاقي إن أمريكا مثلًا حققت أعلى قيمة نمو في صادرات الصناعات الغذائية من مصر، وصلت لـ274 مليون دولار، بزيادة 87 مليون دولار، بعد كده لبنان بـ126 مليون دولار، وألمانيا 119 مليون دولار، وإيطاليا 146 مليون، وحتى الأردن وتركيا وبريطانيا دخلوا المنافسة بأرقام قوية.
اللي بيأكد قوة الصناعة دي، إن إجمالي صادرات قطاع الصناعات الغذائية المصرية وصل خلال النصف الأول من 2025 لحوالي 4 مليار و30 مليون دولار، يعني إحنا بنتكلم عن نسبة نمو 8% مقارنة بنفس الفترة من 2024، زيادة حوالي 291 مليون دولار، ودي أعلى قيمة اتسجلت في تاريخ القطاع.
وطبعًا لازم نذكر الفراولة المجمدة اللي بقت بطل القصة دي، تخيلوا إنها لوحدها جابت 517 مليون دولار، بزيادة 77% عن السنة اللي فاتت، وراها على طول مركزات الكولا اللي جابت 360 مليون دولار بنسبة نمو بسيطة 2%.
أما لو جينا للمجموعات الدولية اللي بتستورد مننا، فالدول العربية لسه في الصدارة بـ1893 مليون دولار رغم إن حصل تراجع بسيط بنسبة 3%، بعدهم الاتحاد الأوروبي بـ870 مليون دولار بزيادة 8%، وبعد كده الدول الإفريقية غير العربية بـ298 مليون دولار، وأمريكا بـ274 مليون دولار بنسبة نمو 47%، وده رقم كبير جدًا.
الجميل في القصة إن القطاع مش بس بيزود صادرات، لكنه كمان بيأكد إن فيه ثقة في المنتج المصري، وإننا قادرين ننافس بجودة وسعر.
السؤال دلوقتي، هل هنشوف مصر قريبًا ضمن الدول المصدرة الأولى في الصناعات الغذائية عالميًا؟ وهل هنقدر نحافظ على وتيرة النمو دي ونضاعفها في السنين الجاية؟
