انتعاش خزينة مصر بـ7.5 مليار دولار.. الزيادات الجديدة في أسعار الكهرباء.. علاقة خفض الفائدة وتحسن سعر صرف الجنيه المصري
منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري، البداية بتقرير عن انتعاش خزينة مصر بـ7.5 مليار دولار.
قال التقرير، إن فيه مليارات الدولارات القطرية هتدخل مصر، وده بعد ما العلاقة بينا بقت مزدهرة ورجعت بقوة تاني، وده باين من حجم الاستثمارات والمشروعات اللي بقت مطروحة، واللي خلى العلاقات دي أقوى، هو لقاء رئيس الوزراء الدكتور مصطفى مدبولي مع نظيره القطري، الشيخ محمد بن عبد الرحمن آل ثاني، والاتنين اتكلموا بشكل واضح عن فرص الاستثمار والتعاون بين البلدين.. مدبولي بنفسه شدد إن الحكومة المصرية مهتمة جدًا تتواصل مع مجتمع الأعمال القطري، وتسهل كل الإجراءات اللي تشجعهم يضخوا استثمارات جديدة في مصر.
تعالوا نبص على الأرقام: دلوقتي في 261 شركة قطرية شغالة في مصر، بمساهمات توصل لـ 2 مليار و165 مليون دولار، منهم حوالي 249 مليون دولار في السياحة، و208 ملايين دولار في الإنشاءات، و36 مليون دولار في الصناعة... غير كده، عندنا 6000 شركة مشتركة مصرية-قطرية شغالة فعلًا، وكمان في الناحية التانية، حوالي 110 شركات مصرية بتشتغل جوه قطر.
التقرير كشف، أن فيه خطوة كبيرة جاية، وهي تفعيل حزمة استثمارات قطرية مباشرة بقيمة 7.5 مليار دولار، الاستثمارات دي هتدخل بشكل تدريجي في قطاعات مختلفة، وأولها أكيد السياحة والعقارات خصوصًا في الساحل الشمالي، ده غير ملفات الأمن الغذائي ومشروعات تانية في البنية التحتية..
كمان في نقطة مهمة بتتدرس حاليًا، وهي تحويل جزء من الوديعة القطرية اللي موجودة في البنك المركزي المصري، واللي قيمتها حوالي 4 مليارات دولار، لاستثمارات مباشرة تبقى جزء من الـ7.5 مليار دولار، يعني الفلوس مش بس محجوزة كوديعة، لكن هتشتغل في مشروعات حقيقية وتخلق فرص عمل وتضيف للاقتصاد.
منصات بانكير قدمت تقرير مختلف النهاردة عن الزيادات الجديدة في أسعار شرائح الكهرباء
التقرير كشف أن تسعير شرائح الكهرباء في مصر بيكون بنظام الشرائح والاستهلاك المنزلي في متقسم علي 7 شرائح الاولي منهم دي بتكون من صفر الي 50 كيلووات ودي بتتحاسب حاليا بسعر 68 قرش لكل كيلووات ساعة، أما الشريحة التانية فدي بتكون استهلاكها بتراوح من 51 الي 100 كيلو وات دي بتتحاسب بسعر 78 قرش، أما الشريحة الثالثة فدي استهلاكها بيكون من صفر الي 200 كيلوات ودي بتتحاسب بسعر 95 قرش، والشريحة الرابعة دي استهلاكها بيتراوح من 201 الي 350 كيلووات ودي بتتحاسب بسعر 155 قرش.
أما الشريحة الخامس فدي استهلاكها بيكون من 351 الي 650 كيلووات ودي بتتحاسب بسعر 195 قرش ، أما الشريحة السادسة من صفر الي 1000 كيلووات ساعة دي بتتحاسب بسعر 210 قرش، واخيرا الشريحة السابعة ودي استهلاكها بيتعدى 1000 كيلووات دي بتتحاسب بسعر 223 قرش، والشريحة دي خارج الدعم، وبيكون حسابها بالسعر الرسمي لإنتاج الكهرباء.
وأضاف تقرير بانكير، أن زيادة الأسعار الجديدة هتتراوح من 15 لـ 35%، وكمان هتوصل 45% للشريحة السابعة من الاستهلاك، وده تتحاسب بسعر الإنتاج الفعلي للكهرباء لانها شريحة اصلا مرفوعة من الدعم تماما .
وأوضح التقرير، أن تطبيق أسعار الشرائح الجديدة الكهرباء، هيكون في النصف الثاني من شهر سبتمبر الحالي على كل القطاعات العدادات الكودية والعدادات مسبوقة الدفع.
وحدة أبحاث بانكير قدمت تقرير خاص النهاردة عن علاقة خفض أسعار الفائدة وتحسن سعر صرف الجنيه المصري.
أكد التقرير، أن فيه شغل كتير اتعمل خلال الفترة اللي فاتت واللي انعكس علي الاقتصاد المصري و حاليا تحسن بشكل كبير جدا وده بشهادة كبري المؤسسات الاقتصادية الدولية واللي أكدت أن الاقتصاد المصري عدي مرحلة صعبة جدا وحاليا موجود في مرحلة مطمئنة جدا، وكل التوقعات بتأكد أن الوقت اللي جاي الجنيه المصري هيحقق مكاسب جديدة ووضعه هيكون افضل بكتير من اللي عليه حاليا .
وأوضح تقرير بانكير، أن اللي عملته الحكومة علشان سعر صرف الجنيه المصري يتحسن، بدأ من قرار البنك المركزي واللي أخذه في مارس 2024 بتحرير سعر صرف الجنيه المصري بشكل مرن، وفي الخطوة دي الحكومة رفعت أيدها تماما من التدخل في سعر الصرف وسعر صرف الجنيه كان بيطلع وينزل بشكل مرن، ده غير أن قدم الحكومة شهادة وفاة السوق السودا في التجارة بالعملات علي طبق من الماظ.
وأشار التقرير إلى خطة تحرير سعر الصرف بشكل مرن كان لها ميزة كمان مهمة جدا وهيا عودة تحويلات المصريين العاملين بالخارج الي القنوات الشرعية في البنوك، خصوصا أن كل تحويلات المصريين قبل القرار ده كانت رايحة في السوق السودا.. كمان الحكومة كملت خطة الاصلاح الاقتصادي، بعملية تخفيض للإنفاق، ده غير التخارج من بعض الشركات والقطاعات المملوكة للدولة واللي بتقوم بيها الدولة حاليا تحت اسم برنامج الطروحات الحكومية واللي بيهدف لتحويل بعض القطاعات الموجودة في الدولة واللي محققة خسائر إلى كيانات ناجحة لها رصيد في الناتج القومي المصري.
