مشروع مصري سعودي هيغير قواعد اللعبة في ملف الطاقة.. إيه اللي بيحصل في قلب الصحراء ؟
يا ترى إيه حكاية شريان النور العملاق اللي مصر بتبنيه في قلب الصحرا والبحر الأحمر؟ وإزاي مصر هتبقى هي بنك الطاقة للمنطقة كلها؟ هل فعلاً بقينا على بعد خطوات من إننا نصدّر الكهربا لأكبر اقتصاد في الشرق الأوسط؟ .. والأهم.. يعني إيه "بدء اختبار المهمات" .. وهل ده معناه إن حلم الربط الكهربائي مع السعودية خلاص بقى حقيقة؟
مشروع الربط الكهربائي المصري السعودي.. المشروع اللي بقاله سنين بيتحضر في هدوء.. النهاردة وصل لمرحلة الحسم.. مرحلة ما قبل التشغيل النهائي. الخبر اللي لسه طالع من وزارة الكهربا بيقول إن مصر بدأت بالفعل في اختبار المهمات والأنظمة للمشروع.
طب يعني إيه الكلام الكبير ده؟
ببساطة شديدة.. تخيل إنك بنيت بيتك خلاص وشطّبته.. قبل ما تسكن فيه بتعمل إيه؟ .. بتختبر كل حاجة.. بتجرب مفاتيح النور.. بتفتح الحنفيات.. بتتأكد إن كل حاجة سليمة.. اهو ده بالظبط اللي مصر بتعمله دلوقتي.. بس على حجم أسطوري.
المهندسين المصريين بيتأكدوا إن كل كابل بحري اترمى في البحر الأحمر.. وكل برج عملاق اتزرع في الصحرا من مدينة بدر في القاهرة لحد المدينة المنورة وتبوك.. وكل جهاز تحكم واتصال.. شغال زي الساعة ومستعد لنقل أول شحنة كهربا بين البلدين.. ونسبة التنفيذ يا جماعة عدت الـ 91%.. يعني بنتكلم في أسابيع أو شهور قليلة والمشروع يشتغل بكامل طاقته.
طب إيه أهمية المشروع ده لمصر؟ .. وليه دافعين فيه أكتر من 1.8 مليار دولار؟
الحكاية هنا فيها ذكاء اقتصادي كبير أوي.. الموضوع مش مجرد بيع وشرا.. لأ.. ده استغلال لعبقرية الجغرافيا والزمن.. إزاي؟ .. هقولك.
ذروة استهلاك الكهرباء في السعودية.. يعني أكتر وقت بيسحبوا فيه كهربا.. بيكون في عز الظهر بسبب الحر الشديد والتكييفات.. في نفس الوقت ده.. استهلاكنا في مصر بيكون أقل نسبياً.. فبيكون عندنا كهربا زيادة.. بدل ما المحطات بتاعتنا تهدى.. هنقوم مصدرين الفايض ده للسعودية وناخد قصاده فلوس بالعملة الصعبة.
والعكس صحيح.. ذروة استهلاكنا إحنا في مصر بتبقى بالليل.. في الوقت ده بيكون استهلاك السعودية قل.. فلو احتاجنا كهربا زيادة في أي وقت.. هناخدها منهم.. يعني باختصار.. شبكات الكهربا في البلدين هتكمل بعض.. وهتضمن إنه عمره ما هيحصل انقطاع للتيار لا هنا ولا هنا.. وهنوفر فلوس الوقود اللي كنا بنشغل بيه المحطات وقت الذروة.
المشروع ده في مرحلته الأولى لوحدها هيمكننا من تبادل 1500 ميجاواط.. وهيترفعوا بعد كده لـ 3000 ميجاواط.. يعني بنتكلم في قدرة توليد تعادل محطة كهربا عملاقة.
لكن الأهم من كل ده.. إن المشروع ده هو درة التاج في خطة مصر عشان تتحول لمركز إقليمي للطاقة.. إحنا بالفعل مرتبطين كهربائياً مع الأردن والسودان وليبيا.. والخط ده مع السعودية هيفتح الباب للربط مع كل دول الخليج.. وهيخلينا البوابة الرئيسية لتصدير الكهربا لأوروبا عن طريق اليونان وقبرص.
