تحرك جديد في سعر الدولار.. إيه اللي بيحصل في سوق صرف العملات الأجنبية؟
يا ترى إيه اللي حصل في سوق الصرف؟.. وليه بعد ما كان الدولار بينزل كل يوم والناس بدأت تطمن.. فجأة صحي من النوم وقرر يغير اتجاهه ويرفع تاني.. هل دي بداية موجة صعود جديدة؟.. هل اللي باع الدولار يستعجل ويشتريه تاني؟.. ولا دي مجرد حركة عادية في السوق؟ والسؤال الأهم.. ليه أصلا مبقاش فيه سعر ثابت ومستقر للدولار زي زمان؟.. ليه كل يوم نصحى على سعر شكل.. يوم طالع وقرشين.. ويوم نازل خمس قروش.. وبقينا محتاجين نتابع شاشة البنك زي ما بنتابع ماتش كورة؟
النهاردة.. وبعد سلسلة طويلة الدولار كان فيها بيخسر من قيمته قصاد الجنيه.. السوق فجأة شاف حركة عكسية.. الدولار بدأ يرفع في 9 بنوك مرة واحدة.. صحيح هي زيادة طفيفة.. بنتكلم في قروش.. لكنها كانت كافية إنها تثير قلق وتساؤلات كتير.
يعني في بنوك كبيرة زي الأهلي ومصر.. الدولار طلع وبقى بـ 48.45 للشراء.. و 48.55 للبيع.. وفي بنوك تانية وصل لـ 48.65 جنيه.. الحركة دي في حد ذاتها مش أزمة.. لكن توقيتها هو اللي خلى الناس تسأل.
وهنا لازم نجاوب على السؤال الأول والأهم.. ليه السعر مبقاش ثابت؟
الإجابة ببساطة.. لأننا دخلنا مرحلة جديدة ومنطقية اسمها "السعر المرن".. يعني انسى تماما فكرة إن البنك المركزي كان بيصحى كل يوم يحدد سعر ثابت للدولار.. دلوقتي السعر بقى عامل زي أي سلعة.. بيحكمه قانون العرض والطلب.. لما المعروض من الدولار يزيد.. سعره يقل.. ولما الطلب عليه هو اللي يزيد.. سعره يرفع.
والطلوع والنزول الطفيف اللي بنشوفه كل يوم ده.. مش علامة خطر.. بالعكس.. ده أكبر دليل إننا بقى عندنا سوق حقيقي وشفاف.. بيتفاعل مع الأخبار والأحداث الاقتصادية لحظة بلحظة.. وده بيدي ثقة أكبر للمستثمر الأجنبي والمحلي
طيب فهمنا ليه السعر بيتغير.. لكن ليه غير اتجاهه النهاردة بالذات وبدأ يرفع؟.. هنا الإجابة كلها بتتلخص في كلمة واحدة: "الترقب".
السوق كله.. من أول أكبر بنك استثمار لحد أصغر مستورد.. حابس أنفاسه ومستني أهم قرار هيصدر نهاية الأسبوع ده.. قرار لجنة السياسة النقدية في البنك المركزي بخصوص "أسعار الفائدة".. الاجتماع ده هو اللي كل الناس عاملة حسابه.. والتوقعات شبه مؤكدة إن المركزي هيخفّض سعر الفايدة.
زي ما قال محمد أبو باشا.. كبير الاقتصاديين في "إي إف جي القابضة".. إن كل المؤشرات بتدعم قرار الخفض بنسبة 1%.. خصوصا مع نزول التضخم لأرقام ممتازة عند 13.9%.. وقوة الجنيه الفترة اللي فاتت.
طب إيه علاقة ده بسعر الدولار؟
العلاقة بسيطة.. لما سعر الفايدة على الجنيه بيقل.. جاذبيته بتقل شوية للمستثمر الأجنبي اللي بيحط فلوسه عشان ياخد فوايد عالية ويمشي.. فبعض المؤسسات والمستثمرين.. كنوع من التحوط أو توقع القرار.. بيبدأوا يشتروا كميات من الدولار قبل الاجتماع.. ولما الطلب بيزيد حبة.. طبيعي السعر يرفع حبة.. وهي دي القروش اللي زادت النهاردة.
حركة الدولار الصغيرة لفوق النهاردة.. مش بداية موجة صعود ولا علامة خطر.. دي مجرد "هزة ترقب" طبيعية جدا قبل القرار الكبير بتاع البنك المركزي.. وهي في حد ذاتها أكبر دليل إن آلية السوق الحر شغالة كويس.. السوق بيسعر الأخبار والتوقعات مقدما.
الطلوع والنزول الطفيف ده هو الوضع الصحي الجديد.. أما الاتجاه الحقيقي للجنيه الفترة الجاية.. فهيحدده قرار البنك المركزي يوم الخميس.. ومدى قوة الاقتصاد المصري اللي كل المؤشرات بتقول إنه بيتعافى وبيزداد قوة.
