لو نفسك في شقة العمر.. فتح الحجز في 5 مشروعات سكنية خلال أيام.. شوف التفاصيل وطريقة الحجز
يا ترى أخبار الحجز في الشقق الجديدة إيه، وهل فعلا في مشروعات سكنية هتتفتح الأيام الجاية، ولو كده إيه هي الشروط؟.
في الحقيقة، هيئة المجتمعات العمرانية وبنك التعمير والإسكان أعلنوا رسميا إن نظام الحجز الإلكتروني راجع تاني بعد ما كان في كلام عن العودة للقرعة العلنية.
ونقدر نقول ان القرار ده جي استجابة لمطالب الناس اللي عايزين يختاروا وحداتهم بإيدهم أونلاين بدل ما يعتمدوا على القرعة.
وكان يون الأحد 7 سبتمبر 2025 هيتفتح الحجز في مشروع الإسكان المتنوع البشاير 3-5 بمدينة الإسكندرية، وكمان يوم الثلاثاء 9 سبتمبر هيكون الدور على مشروع ديارنا – المرحلة الأولى، ويوم الخميس 11 سبتمبر الطرح هيشمل مشروع جنة ومشروع سكن مصر بمدينة المنصورة الجديدة وكمان الإسكان الحر بمدينة السويس الجديدة.
والنقطة الأهم هنا إن العودة للحجز الإلكتروني معناها سهولة وشفافية أكبر، وكمان بتدي فرصة لكل واحد يحدد الوحدة اللي تناسبه من غير لَف أو دوران، وده بيأكد إن البنك والهيئة بيحطوا رضا العملاء على قمة الأولويات.
كمان، البنك أعلن إن أي حد عايز يسترد مبلغ جدية الحجز اللي دفعه قبل فتح الباب، يقدر يعمل كده لحد يوم الخميس 28 أغسطس 2025 من خلال فروع بنك التعمير والإسكان.
وخطوات الحجز سهلة جدا، فأول حاجة بتدخل على موقع بنك التعمير والإسكان، بتسجل بياناتك وتختار المشروع اللي يناسبك، بعدها بتحدد الوحدة وتدفع جدية الحجز أونلاين أو من خلال الفروع، وكل العملية ممكن تخلص في دقائق من غير ما تضطر تتحرك من بيتك.
واللي يهم الناس كمان، إن المشروعات دي متوزعة في أكتر من مدينة جديدة، يعني اللي عايز يستقر في إسكندرية أو المنصورة الجديدة أو حتى السويس هيلاقي فرصة، وده بيخلي الطرح مناسب لشريحة كبيرة من الشباب والأسر اللي بيدوروا على شقة العمر في مكان يفتح قدامهم مستقبل.
وهنا الخبرا شايفين إن الطرح الجديد هيفتح باب أمل لآلاف الأسر اللى بيدوروا على شقة العمر في مدن جديدة خاصة مع تنوع المشروعات ما بين شقق اقتصادية ومتوسطة وفاخرة، وده معناه إن كل شريحة هتلاقي اللي يناسبها.
يعني باختصار، الأيام الجاية فرصة ذهبية للي عايز يحجز شقة العمر والموضوع كله هيتم إلكتروني وبخطوات سهلة.
