تحرك جديد للدولار.. شركة يابانية تستثمر في قناة السويس.. والذهب يواصل الصعود
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، تحرك جديد للدولار، وشركة يابانية تستثمر في قناة السويس، والدهب بواصل الصعود.
نبدأ جولتنا من سوق الصرف
النهاردة، شهد سعر الدولار قدام الجنيه المصري ارتفاع ملحوظ في التعاملات في عدد من البنوك. الدولار زاد حوالي من 15 لـ16 قرش، حسب بيانات البنوك اللي شغالة في السوق المحلي.
في البنك الأهلي المصري، سعر الدولار وصل لـ48.70 جنيه للشراء، و48.80 جنيه للبيع.
أما في بنك قناة السويس فسجل 48.71 جنيه للشراء، و48.81 جنيه للبيع.
كمان الدولار ارتفع في بنك الشركة المصرفية العربية الدولية (saib) وبقى بـ48.70 جنيه للشراء، و48.80 جنيه للبيع.
وفي بنك مصر وبنك تنمية الصادرات، سجل سعر الشراء 48.65 جنيه، وسعر البيع 48.75 جنيه.
أما في بنك أبوظبي الإسلامي فسعر الدولار وصل لـ48.70 جنيه للشراء، و48.80 جنيه للبيع.
وفي بنك فيصل وكريدي أجريكول سجل 48.66 جنيه للشراء، و48.76 جنيه للبيع.
نروح دلوقتي لرئيس الوزراء الدكتور مصطفى مدبولي.. اللي قابل النهاردة الرئيس والمدير التنفيذي وعضو مجلس إدارة مجموعة "تويوتا" اليابانية، وكان معاه في اللقاء الدكتورة رانيا المشاط، وزيرة التخطيط والتنمية الاقتصادية والتعاون الدولي. اللقاء حصل على هامش مشاركة مدبولي نيابة عن الرئيس عبد الفتاح السيسي في قمة "تيكاد ٩" اللي بتستضيفها مدينة يوكوهاما في اليابان.
مدبولي في بداية اللقاء أشاد بالعلاقة القوية والتاريخية اللي بترجع لـ93 سنة بين مصر ومجموعة "تويوتا تسوشو".
وأكد إن تويوتا شغالة في مصر في مشاريع كتير زي الطاقة المتجددة، والرعاية الصحية، والأغذية، غير نشاطهم الأساسي في مجال العربيات.
ودعاهم للاستثمار في المنطقة الاقتصادية لقناة السويس، خصوصًا إن مصر عضوة في تكتلات اقتصادية كبيرة بتسهل دخول منتجاتهم لأسواق كتير.
وأشار كمان لرغبته في الإسراع بالانتهاء من مذكرة التعاون في التعليم الفني، وقال إن اليابان وعدت تخلصها قريب، وتم بالفعل مناقشة الموضوع مع الجايكا والسفارة اليابانية في القاهرة.
نروح بقى لسوق الدهب.. الدهب رجع تاني يطلع في بداية تعاملات النهاردة، بعد ما كان بينزل من امبارح.
وسجل سعر جرام الذهب عيار 21 زيادة بـ5 جنيه، وبقى حوالي 4550 جنيه، حسب منصة "أي صاغة" المتخصصة في تداول الدهب والمجوهرات أونلاين.
أسعار باقي الأعيرة كانت كالتالي:
* عيار 24: سجل 5205 جنيه.
* عيار 22: سجل 4772 جنيه.
* عيار 21: سجل 4555 جنيه.
* عيار 18: سجل 3904 جنيه.
* عيار 14: سجل 3036 جنيه.
* الجنيه الدهب: وصل لـ36440 جنيه.
* وسعر الأوقية عالميًا: سجل حوالي 3339 دولار.
ونختم بخبر من وزارة الاستثمار
المهندس حسن الخطيب، وزير الاستثمار والتجارة الخارجية، قابل السفير الهندي في القاهرة "سوريش كى ريدي". اللقاء ناقشوا فيه سُبل زيادة التعاون الاقتصادي والتجاري والاستثماري بين مصر والهند، وكمان تبادلوا وجهات النظر بخصوص الفرص اللي ممكن يشتغلوا عليها سوا في المستقبل.
الوزير أكد على عمق العلاقات الاستراتيجية بين البلدين، واللي بترجع لتاريخ طويل من التعاون، وقال إن في أهمية كبيرة لتكثيف الجهود علشان العلاقات دي تتحول لمشروعات حقيقية تخدم اقتصاد البلدين.
وأضاف كمان إنهم ناقشوا فرص لزيادة الاستثمارات الهندية في السوق المصري، وفتح مجالات جديدة للتعاون بين رجال الأعمال في البلدين.
