لو هتشتري عربية جديدة.. شوف التقرير ده الأول
هو إيه اللي بيحصل في سوق السيارات دلوقتي وليه الأسعار بتنزل وخبراء السوق بينصحوا بايه المواطنين اللي ناووين يشترو عربية جديدة أو مستعملة..
لو متابع سوق السيارات حاليا هتعرف إن الأسعار في النازل لكل الموديلات والتخفيضات وصلت ل350 و400 ألف جنيه في بعض الموديلات.. طيب ايه اللي حصل؟
شوف يا سيدي سوق السيارات اكتر الأسواق اللي اتاثرت من ساعة الحرب الروسية الأوكرانية واللي ظهرت بعدها أزمة الدولار في مصر نتيجة ارتفاع فاتوره الاستيراد مع الارتفاعات القياسية في أسعار السلع المستوردة وكمان لأن الدولة خدت قرارات صارمة بخصوص السلع الترفيهية أو الغير ضرورية لترشيد انفاق الدولار ودا كان إجراء لابد منه.. لكن دلوقتي الوضع اتغير والسوق بدأ يتعافي بشكل حقيقي ومستدام والاسعار بدأت تنزل مع توافر الدولار مع تحسن الموارد الدولارية بشكل كبير ودا فتح الباب من تاني لاستيراد السيارات وقطع الغيار.
كمان فيه سبب تاني ورا انخفاض أسعار السيارات وهي التوسع في التصنيع المحلي سواء من خلال الشركات المحلية زي عودة النصر للسيارات أو دخول شركات أجنبية للتصنيع في السوق المصري الواعد ودلوقتي فيه7 مصانع جديدة بتدخل السوق ومع توقعات بتراجع الأسعار بنسبة 30% على الأقل مع بداية طرح الإنتاج الجديد محليا.
منتصر زيتون، رئيس رابطة تجار السيارات، كشف عن دخول 7 مصانع جديدة لتجميع السيارات، بما فيها وكلاء صينيون، في خطوة هتغير شكل المنافسة وتدعم بقوة صناعة السيارات المحلية.
خبراء السوق أكدوا أن أسعار السيارات الجديدة والمستعملة شهدت بالفعل تراجعاً كبيراً ومن المتوقع استمرار هذا الانخفاض خلال الفترة القادمة.. أسامة أبو المجد نائب رئيس شعبة السيارات أكد من ناحيته أن الأسعار تراجعت بالفعل بنسبة تصل إلى 25%، مع توقعات بوصول نسبة الانخفاض إلى 30% خلال النصف الثاني من العام و أن الأسعار شهدت تراجعاً مبدئياً بنسبة 10%، مع ترقب لمزيد من الانخفاضات مع اشتداد المنافسة بين الشركات.
وزي ما قلنا التراجع الكبير في الأسعار بيرجع لعدة أسباب منها زيادة التصنيع المحلي وتوطين صناعة السيارات في مصر والاهتمام الحكومي الكبير بالتعمق في هذه الصناعة وكمان التعاون مع القطاع الخاص والشركات العالمية لزيادة نسبة المكون المحلي في السيارات المجمعة وفي ظل هذه الانخفاضات الكبيرة خبراء السوق بينصحوا أي حد بيفكر يشتري سيارة جديدة أو مستعمل إنه ينتظر شوية لغاية ما الطرازات الجديدة ماتنزل السوق لأن الأسعار وقتها هتنزل اكتر ولما أسعار السيارات الزيرو بتنزل بيقابله انخفاض مباشر في أسعار المستعمل.
