تحرك جديد في ملف الإيجار القديم.. هدوء حذر في سوق الدهب.. استقرار سعر الدولار
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، تحرك جديد في ملف الإيجار القديم، وهدوء حذر في سوق الدهب، واستقرار سعر الدولار
نبدأ من سوق الصاغة.. النهارده، أسعار الدهب مستقرة عند نفس مستويات إقفال امبارح، بعد موجة نزول طول الأسبوع.
عيار 24 سجل حوالي 5200 جنيه.
عيار 22 سجل حوالي 4766 جنيه.
عيار 21 عند 4550 جنيه.
عيار 18 حوالي 3900 جنيه.
الجنيه الدهب وصل لـ 36400 جنيه.
والأوقية عند 3338 دولار.
امبارح أسعار الدهب نزلت شوية بعد ما بيانات التضخم في أمريكا طلعت أعلى من المتوقع، وده قلل التوقعات إن الفيدرالي الأمريكي (البنك المركزي) يخفض الفايدة 50 نقطة أساس في سبتمبر.
ومن الدهب نروح للدولار
الدولار مستقر وهادي قدام الجنيه المصري، النهارده، جوه البنوك مع العطلة الأسبوعية، بعد ما كان نزل الأيام اللي فاتت.
الأسعار آخر تحديث:
البنك المركزي: 48.23 شراء – 48.36 بيع.
مصرف أبو ظبي الإسلامي: 48.32 شراء – 48.42 بيع.
البنك العقاري المصري العربي: 48.72 شراء – 48.82 بيع.
بنك نكست: 48.32 شراء – 48.42 بيع.
ونروح لمجلس الوزراء.. النهارده د. مصطفى مدبولي، رئيس الوزراء، راس اجتماع مجلس المحافظين في مقر الحكومة بالعلمين الجديدة لمناقشة موضوعات مهمة.
وأكد إن الحكومة مركزة على تنفيذ القانون رقم 164 لسنة 2025 بخصوص قوانين الإيجار وتنظيم العلاقة بين المالك والمستأجر بعد تصديق الرئيس السيسي عليه. وده محتاج تنسيق كامل بين الوزارات والمحافظات علشان يتنفذ صح.
مدبولي شدد إن المحافظين لازم يبدأوا فورًا في تشكيل لجان الحصر اللي هتكون برئاسة قيادات من كل محافظة، ومعاهم خبراء من وزارة الإسكان، هيئة المساحة، ومصلحة الضرائب العقارية. الهدف إن النتائج تبقى دقيقة، ويتطبق القانون بحيادية.
ونروح لوزارة قطاع الأعمال
المهندس محمد شيمي، وزير قطاع الأعمال العام، قال إن رجوع شركة النصر لصناعة السيارات للإنتاج خطوة استراتيجية لتوطين صناعة العربيات في مصر وتحقيق قيمة مضافة للاقتصاد.
الكلام ده قاله خلال زيارة مفاجئة لشركة النصر، وتفقد المصانع وخطوط الإنتاج. الوزير تابع شغل مصنع الأتوبيسات اللي بينتج طرازات مختلفة زي:
الأتوبيس السياحي نصر سكاي.
الميني باص نصر ستار.
والأتوبيسات صديقة البيئة شغالة بالغاز الطبيعي نصر جرين.
وكمان استعرض الاستعدادات النهائية لمصنع سيارات الركوب (الملاكي) اللي اتطور بشكل كامل بخطوط تجميع ودهان وألبو جديدة، علشان يرجع الإنتاج بمعايير عالمية.
