كارت موحد بدل الخبز المدعم.. هل اقترب اليوم الموعود؟
الناس كلها قلقانة هل ممكن الحكومة ترفع الدعم عن رغيف العيش، ولو ده حصل الرغيف هيكون بكام، والمواطن البسيط هيعمل اية.. وهل فعلا الحكومة عايزة تجوع المصريين وهنمشي بمبدا اللي معهوش ميلزموش.
من يوم أعلن الحكومة التعاون مع صندوق النقد الدولي وبداية الاتجاه في طريق رفع الدعم التدريجي عن السلع والخدمات اللي بتقدمها الدولة للمواطنين وكل الناس عندها قلق هل هيجي اليوم اللي الحكومة ترفع ايدها بالكامل عن دعم رغيف الخبز ولو ده حصل الاسعار هتوصل لكام، واية موفق الطبقات البسيطة، خصوصا ان رغيف الخبز ده حاجة محدش يقدر يستغني عنها، ومختلف تماما عن تحرير اسعار المواد البترولية واسعار شرائح الكهرباء.
التخوف الأكبر اللي بقي موجود عند الحكومة بدأ من وقت ما الحكومة اخذت قرار برفع اسعار الخبز المدعم من 5 الي 20 قرش واللي كان في شهر يونيو 2024، والكلام اللي خرج عن الحكومة بالاتجاه لتحويل الدعم التمويني الي دعم نقدي، كخطة من الحكومة لتوجيه الدعم لمستحقيه.
طيب اية حكاية تحويل دعم السلع التموينية لدعم نقدي؟.
الحكومة ممثلة في وزارة التموين والتجارة الداخلية بدأت في تحويل دعم السلع التموينية لدعم نقدي تحت اسم منظومة الكارت الموحد واللي بدأت المرحلة التانية منها في محافظات بورسعيد بشكل كامل واللي مستهدف انها تتعمم علي باقي محافظات الجمهورية خلال الوقت اللي جاي، وده بهدف ميكنة الخدمات وتعزيز الشفافية خصوصا أن المنظومة الجديدة هتوفر حزمة من الخدمات للمواطنين عبر كارت ذكي واحد كبديل عن بطاقات الدعم التمويني الحالي.
اما بقي الناس اللي بتسال علي بطاقات التموين فالحكومة أكدت أن منظومة الكارت الموحد هتشمل استخدامه في صرف المقررات التموينية والخبز، والبطاقات التموينية هتفضل شغالة للناس اللي لسه مش معاهم الكارت الموحد، وهيتم الغاءها بمجرد اكتمال استخراج الكارت الموحد.
طيب اية هو الكارت الموحد ده واية هتكون استخداماته؟.
الكارت الموحد هيكون عبارة عن بطاقة إلكترونية مسبقة الدفع هتستخدم لإيداع واستقبال مبالغ مباشرة على البطاقة وهتستخدم كمان في اتمام عمليات الشراء من ماكينات نقاط البيع عند التجار وممكن كمان المواطن يستخدمها في عمليات السحب النقدى من ماكينات الصراف الآلي من الهيئة القومية للبريد، ده غير أن المواطن يقدر يستخدمها في مدفوعات الخدمات الحكومية الرقمية ومعاملات صرف الدعم المخصص للخبز والسلع التموينية في المخابز والبقالين وخدمات التأمين الصحى الشامل.
