بنتحول لمركز إقليمي مهم.. مصر تدخل مرحلة جديدة في صناعة الذهب
هو إيه اللي بيحصل في سوق الدهب العالمي والمحلي دلوقتي؟ .. وهل فعلاً أسعار الدهب هتوصل لأرقام قياسية جديدة؟ .. ومصر إزاي بتستعد عشان تبقى لاعب رئيسي في صناعة الدهب على مستوى المنطقة؟ .. وإيه حكاية استيراد الدهب الخام وإعادة تصديره بعد تصنيعه؟ .. وإزاي الخطوة دي هتغير خريطة الاستثمار في الدهب في مصر تمامًا؟
مصر بتلعب لعبة جديدة ومختلفة تمامًا في عالم الدهب .. مش بس بنبيع ونشتري دهب مصنع محليًا .. لأ .. الموضوع دلوقتي بقى أكبر وأوسع بكتير .. وبدأنا نتحول لمركز إقليمي لتجارة وصناعة الدهب .. زي الدول الكبيرة في المجال ده .. زي الإمارات وتركيا.
إيهاب واصف .. رئيس شعبة الذهب والمعادن الثمينة باتحاد الصناعات .. بيقول إننا دخلنا مرحلة جديدة اسمها "استيراد الذهب الخام" .. يعني بنجيب الدهب الخام من بره .. بأعيرة مختلفة .. وبنعمله تنقية وتصنيع في مصانعنا المصرية .. وبعدين بنصدره تاني للأسواق العالمية .. ودي خطوة متقدمة جدًا مكانتش بتحصل من سنين.
الخطوة دي مش كلام وخلاص .. الأرقام بتؤكدها .. الجهاز المركزي للتعبئة العامة والإحصاء بيقول إن واردات مصر من الدهب الخام زادت في شهر مايو اللي فات بنسبة 199.1% .. يعني تقريبًا الضعف .. ووصلت قيمتها لـ 71.04 مليون دولار .. مقابل 23.75 مليون دولار بس في نفس الشهر السنة اللي فاتت .. وده معناه زيادة حوالي 47 مليون دولار في شهر واحد.
القفزة الكبيرة دي في استيراد الدهب الخام .. هي اللي هتشغل عجلة التصدير .. وتدي دفعة قوية للصناعة الوطنية .. لأننا دلوقتي مش بنصدر ذهب مصنع تقليدي .. لأ .. إحنا بنضيف قيمة للذهب الخام ده وبنعيد تصديره .. وبكده بنزود قيمته وسعره .. وبنحقق مكاسب أكبر بكتير.
طبعًا كل التطورات دي بتيجي في وقت سوق الدهب العالمي بيشهد ارتفاعات ملحوظة .. أونصة الدهب العالمية كملت مكاسبها للأسبوع التاني على التوالي .. ووصل سعرها لـ 3397 دولار .. وده بسبب زيادة الطلب على الدهب كملاذ آمن في ظل التوترات التجارية العالمية .. وكمان بسبب التوقعات اللي بتقول إن البنوك المركزية هتبدأ تخفض أسعار الفايدة .. وده بيخلي الدهب أكثر جاذبية للمستثمرين.
وعلى المستوى المحلي .. سعر جرام الدهب عيار 21 زاد هو كمان .. بس بشكل بسيط .. زاد 20 جنيه بس .. ووصل لـ 4615 جنيه للجرام .. بعد ما كان 4595 جنيه في بداية الأسبوع .. الارتفاعات دي في سعر الدهب المحلي والعالمي بتأكد إن الدهب لسه محتفظ بقوته كملاذ آمن للمستثمرين في كل حتة.
الخطوة دي في استيراد الدهب الخام وتصنيعه محليًا وإعادة تصديره .. هتكون ليها تأثير إيجابي كبير على الاقتصاد المصري .. هتزود صادراتنا .. وتجيب لنا عملة صعبة .. وهتخلق فرص عمل جديدة في مصانعنا .. وهتثبت مكانة مصر كمركز إقليمي في صناعة الدهب.
