السر في بداية الموسم السياحي الشتوي.. شوف ليه الحكومة اختارت بداية نوفمبر لافتتاح المتحف المصري الكبير
أخيرا وبعد طول انتظار الحكومة حددت الميعاد النهائي لافتتاح المتحف المصري الكبير واللي هيكون أيقونة المتاحف في قارة أفريقيا ومنطقة الشرق الأوسط.. ياتري أمتي هيكون الإفتتاح ده.. وآية اللي هيحصل فيه وليه الحكومة اختارت التوقيت ده بالذات.
بعد فترات طويلة من التأجيلات خلاص الحكومة حددت وبشكل نهائي ميعاد افتتاح المتحف المصري الكبير واللي بيعد أكبر متحف للإثار في منطقة الشرق الأوسط وأفريقيا واللي هيعرض أكثر من 53 الف قطعة أثرية أغلبهم هيعرض لاول مرة في التاريخ من وقت اكتشافهم خصوصا المجموعة الأثرية للملك الذهبي توت عنخ آمون واللي المتحف هيعرض لاول مرة المجموعة بتاعته كامل واللي بيوصل عددها لأكثر من 3500 قطعة أثرية في قاعة مخصصة ليهم وهيكون اول واحد يدخل الصالة دي هو الرئيس عبدالفتاح السيسي رئيس الجمهورية.
الحكومة حاطة امل كبير جدا علي المتحف المصري الكبير أنه يحقق طفرة في إعداد السائحين الوافدين لمصر خصوصا بعد الزيادة الكبيرة.
السيطرة اللي عملتها مصر في عدد السائحين الوافدين لقارة افريقيا خصوصا دول الشمال الإفريقي بتحقيق 8.9 مليون سائح خلال أول 6 شهور من 2025، والرقم ده هو الاعلي علي كل دول افريقيا خصوصا دولة المغرب واللي بتعد المنافس الأهم والأكبر لينا في استقطاب اعداد السائحين بدول شمال افريقيا.
طيب أمتي هيكون موعد افتتاح المتحف المصري الكبير وآية سر اختيار يوم الافتتاح ؟.
الحكومة أعلنت وبشكل رسمي عن اختيار يوم 1 نوفمبر كمعياد نهائي لافتتاح المتحف المصري الكبير وده بعد موافقة الرئيس عبدالفتاح السيسي علي اختيار اليوم المحدد للافتتاح واللي هيتم فيه توجيه الدعوة لعدد كبير من قادة وملوك ورؤساء دول اغلب دول العالم للحضور الي مصر وحضور حفل الافتتاح، واللي هيتم تنظيمه علي مدار أكثر من 4 ايام، اليوم الأول منهم هيكون مخصص لرؤساء الدول والملوك اللي جايين يحضروا حفل الافتتاح، واليوم الثاني هيكون مخصص لرؤساء الحكومات واليوم الثالث هيكون مخصص للوزراء واليوم الرابع هيكون مخصص لرجال الأعمال والمشاهير، وده بهدف جزء أنظار العالم كله لحفل الافتتاح.
الحكومة اختارت الاول من نوفمبر المقبل كمعياد لحفل افتتاح المتحف المصري الكبير خصوصا أنه هيكون بداية الموسم السياحي الشتوي واللي مصر بتشهد فيه اقبال كبير جدا من السائحين والوافدين من اغلب دول العالم علي مصر لقضاء الإجازات بسبب ارتفاع درجة البرودة في دول أوروبا، والحكومة بتستهدف تحقيق 5 مليون سائح زيادة في الأرقام المستهدفة بالاستراتيجية الوطنية للسياحة مع افتتاح المتحف.
