الذهب يتماسك رغم العواصف.. شوف خريطة الأسعار الفترة الجاية
يا ترى إيه سر تماسك الدهب اليومين دول رغم العواصف اللي شغالة في أمريكا، هل ممكن الفترة الجاية تشهد ارتفاع في الأسعار ولا ممكن نصحى على موجة انخفاض زي ما حصلت الشهر اللي فات؟
في الحقيقة، سوق الدهب مستقر إلى حد كبير، والجرام عيار 21 سجل دلوقتى حوالى 4600 جنيه، وده رقم قريب من قفلة الأسبوع اللي فات، يعني إحنا بنتكلم عن ثبات شبه تام.
كمان، عيار 24 سجل حوالي 5257 جنيه، وعيار 18 حوالي 3943 جنيه، أما الجنيه الدهب فاستقر عند 36800 جنيه، أما عالميا فالأوقية وصلت ل3363 دولار، بعد ما كانت 3337 دولار الأسبوع اللي فات.
ونقدر نقول، إن اللي بيحصل إن تقرير الوظايف الأمريكي الأخير طلع مخيب للآمال، والاقتصاد الأمريكي ضاف بس 73 ألف وظيفة، في حين إن التوقعات كانت 110 ألف، وكمان راجعوا بيانات الشهور اللي فاتت ولقوها أضعف من اللي أعلنوه، وكل ذه طبعا خلا الأسواق تتوقع إن البنك الفيدرالي الأمريكي هيخفض الفايدة في سبتمبر، وده هينعكس بشكل إيجابي على الدهب واسععرها هترتفع.
بس دلوقتي ببساطة، العالم بقى متوتر والدولار وقع شوية، والناس بتدور على ملاذ آمن فكان طبيعي إن الدهب يثبت مكانه، ورغم توقعات الفايدة المنخفضة، عوايذ السندات الأمريكية رجعت تعلى تاني، وده خفض من مكاسب الدهب شوية.
كمان، "سيتي جروب" قالت في تقريرها الجديد إنهم شايفين إن الدهب ممكن يوصل ل 3600 دولار للأوقية في الربع التالت من 2025، بعد ما كانوا متوقعين أقل من 3000 دولار، وده بيتماشى مع بنوك تانية كبيرة زي جولدمان ساكس وفيديليتي، اللي شايفين إن العالم داخل على مرحلة عدم استقرار اقتصادي، والدهب دايما بيكون الملاذ الآمن.
طيب إيه اللي جاي؟
الأسبوع ده مفيش بيانات تقيلة قوي من أمريكا، بس في مؤشرات مهمة هتغير الخريطة، زي مثلا قرار الفايدة في إنجلترا وكمان طلبات البطالة الأمريكية.
يعني الأسبوع ده شكله هادي من بره بس ممكن أي خبر يقلب الدنيا في لحظة، عشان كده الدهب دلوقتي ماسك نفسه، لا بيجري لقدام ولا راجع وره، بس ثابت ومستني الفرصة، يعني لو مثلا الفايدة لو نزلت فعلا في سبتمبر، ساعتها ممكن نشوف موجة ارتفاعات جديدة للمعدن الأصفر.
