بعد الإقبال الشديد عليها.. شوف خطة الحكومة لطرح وحدات سكن بديلة لمحدودي ومتوسطي الدخل
جزء كبير من اهتمام الحكومة بالفئات محدودة ومتوسطة الدخل بيكون عن طريق طرح وحدات الإسكان الاجتماعي.. ياتري اية اللي بيحصل في الملف ده وهل هتكون في طروحات تانية في المستقيل قدام المواطنين.
الحكومة ممثلة في وزارة الإسكان والمجتمعات والمرافق العمرانية بتلعب دور كبير جدا في خدمة الفئات الاولي بالرعاية ومحدودة الدخل من خلال برامج الإسكان الاجتماعي المختلفة اللي بتطرحها الوزارة من وقت للتاني خصوصا أن البرامج دي كان عليها اقبال كبير جدا من المواطنين وده اللي ظهر في الحشود الكبيرة اللي كانت موجودة قدام مكاتب البريد في طرح سكن لكل المصريين 5 لشراء كراسة الشروط، والارقام الكبيرة اللي قدمت في الطرح واللي تعدوا أكثر من 500 الف مواطن اشتروا كراسة الشروط وكمان دفعوا مبالغ جدية الحجز واللي وصلت ل 30 الف جنيه.
الاقبال الكبير اللي حصل من الناس علي طرح وحدات سكن لكل المصريين 5 وحرص الدولة علي رعاية الفئات الاولي بالرعاية خلي القيادة السياسية توجه الحكومة لإعادة طرح وحدات جديدة لمشروعات الإسكان الاجتماعي وده اللي حصل والحكومة أعلنت حاليا علي طرح اكثر من 113 الف وحدة سكنية مختلفة للفئات محدودة ومتوسطة الدخل وهتكون الأولوية فيهم للناس اللي كانت مقدمة في طرح سكن لكل المصريين 5 واللي هما كانوا خارج الأولوية أو غير مطبق عليهم الشروط بشرط تعديل سبب الاستبعاد سواء كان ملكية عداد كهرباء او عداد غاز طبيعي.
الطرح الجديد من شقق الاسكان الاجتماعي سكن لكل المصريين 7 عليه اقبال كبير جدا من المواطنين للحجز،. وعلشان الدولة تسهل إجراءات الحجز، فالحجز حاليا بيكون الكتروني من خلال بوابة مصر الرقمية وده خطوة من الحكومة للتسهيل علي المواطنين في حجز الوحدات، بدل البهدله والوقفة الكثيرة اللي كانت قدام مكاتب البريد لشراء كراسات الشروط.
طيب اية شروط حجز شقق الاسكان الاجتماعي الجديدة؟
وزارة الإسكان حددت خطوات التقديم على حجز الشقق السكنية واللي بتكون من خلال بوابة مصر الرقمية، وده خلال الدخول علي الموقع وحجز كراسة الشروط ودفع سعرها وتنزيلها من علي الموقع وبعدين، وإرفاق المستندات المطلوبة للتقديم.
الطرح الجديد لشقق الاسكان الاجتماعي بيكون بنظام التمويل العقاري للعملاء منخفضي الدخل بفائدة 8% سنوياً، وللعملاء متوسطي الدخل بفائدة 12٪ سنويا بمقدم يبدأ من 20% لمدة بتوصل 20 سنة، والوزارة اشترطت أن يكون سمن المتقدم من منخفضي ومتوسطي الدخل لا يقل عن 21 سنة في تاريخ نهاية الإعلان، وأن يكون له أهلية التصرف والتعاقدؤ وكمان سنه ميزدتش عن 50 سنة في تاريخ الإعلان.
الطرح الحالي لشقق الاسكان الاجتماعي مش هيكون الاخير وهيكون في طروحات تانية قدام الفئات الاولي بالرعاية ومتوسطي الدخل، وده في اطار المبادرة الرئاسية سكن لكل المصريين.
