شوف الحكومة بتعمل ايه علشان تصرف شريحتين من قرض الـ 8 مليار دولار
مصر عندها تحدي صعب وهو الانتهاء من برنامج الطروحات الحكومية.. ياتري مصر بتعمل اية في الملف ده .. وآية خطوات الحكومة للانتهاء من طرح الشركات قدام القطاع الخاص.. واية الفائدة اللي هترجع علي الدولة الملف ده.
الحكومة في الفترة الحالية قدامها تحدي صعب وهو إنجاز ملف الطروحات الحكومية خصوصا أن الملف ده كان السبب في قرار صندوق النقد الدولي بتأخير صرف الشريحة الخامسة من قرض الـ 8 مليار دولار واللي مصر حصلت علي موافقته في مارس 2024 وصرفت منه 4 شرائح حتي الآن كان آخرها الشريحة الرابعة اللي صرفها الحكومة من كام شهر واللي وصلت قيمتها ل 1.2 مليار دولار.
بعد ما الحكومة صرف الشريحة الرابعة من قرض ال 8 مليار دولار من صندوق النقد الدولي، واللي اخذت فترات طويلة من المناقشات بين الحكومة ووفد الصندوق علي ما الصندوق تفهم رؤية مصر عن أسباب تأخرها في تنفيذ بعض البنود اللي المفروض كانت الحكومة تنتهي منها ولكن بسبب الظروف والتحديات الجيوسياسية والاقتصادية اللي فرضت علي مصر بسبب الصراعات الموجودة بين اغلب دول العالم خصوصا في المنطقة العربية واللي بسببها إيرادات مصر الدولارية تأثرت بنسبة كبيرة جدا خصوصا إيرادات قناة السويس واللي تأثرت باكثر من 70% عن الإيرادات اللي كانت بتحققها القناة في الوقت اللي فات واللي وصلت إجمالي خسائرها لأكثر من 7 مليار دولار، ده غير الخسائر اللي حققها قطاع السياحة واللي كان المفروض يحقق ارقام اعلي من كده بكتير رغم أنه حقق رقم قياسي في عدد السائحين الوافدين لما وصلنا ل 14.9 مليون سائح وحققنا أكثر من 14 مليار دولار كايرادات من القطاع، ولكن القطاع كان مرشح أنه يحقق ارقام اعلي من كده بكتير لولا زيادة التوترات الجيوسياسية والاقتصادية.
طيب ايه اللي بيحصل في برنامج الطروحات الحكومية وآية اللي بتعمله الحكومة في الملف ؟
المراجعة الخامسة واللي كانت موجودة في مصر خلال كام شهر رفضت اعتماد الشريحة الخامسة من قرض ال 8 مليار دولار بسبب تاخر الحكومة في تنفيذ برنامج الطروحات الحكومية، وصندوق النقد الدولي قرر تأجيل المناقشة الخامسة علشان يكون ميعادها مع المراجعة السادسة لحين بدء طرح بعض الشركات المملوكة للقطاع العام في البورصة قدام القطاع الخاص .
الحكومة خلال الفترة الحالية بدأت مناقشات مع الاستشاري الدولي اللي متعاقدين معاه علشان يناقشوا إجراءات الطرح للشركات المملوكة للقطاع العام في البورصة المصرية، واللي هتشمل عدد من الشركات المملوكة للقوات المسلحة زي شركة صافي وشركة وطنية، وغيرها من الشركات اللي هتطرح قدام القطاع الخاص.
إجراءات الطرح الجديدة هتتضمن كمان دخول المطارات في إجراءات الطرح، واللي هتبدا بطرح مطار الغردقة قدام القطاع الخاص وعلي فكرة مصر من اول مرة تطرح مطار للشراكة قدام القطاع الخاص لا ده احنا عندنا تجربة مماثلة في الشراكة مع خلال مطار مرسي علم واللي تشغيله بيتم بالشراكة بين القطاعين العام والخاص.
