السر في سيناريو 2018 .. ليه الحكومة مش مستعجلة على رفع سعر الجنيه؟
هو ليه الحكومة مش عايزة الجنيه سعره يرتفع بسرعة.. هو مش المفروض ده يكون خبر حلو للبلد وللناس.. طيب إيه اللي هيحصل للفائدة الفترة الجاية.. وهل فعلا الجنيه ممكن يرجع قوته تاني ويبقى أعلى من قيمته اللي عليه دلوقتي.
بص يا سيدي.. الحكومة مش بترفض إن الجنيه يتحسن لكن مش عايزة الموضوع يحصل فجأة وبسرعة.. ليه بقى.. عشان فيه تجربة سابقة سنة 2018 لما الفلوس الساخنة دخلت البلد بشكل كبير ورفعت الجنيه بسرعة.. لكن في أول أزمة هربت السيولة دي والجنيه وقع تاني.. فالحكومة دلوقتي بتقولك لأ.. نمشيها خطوة خطوة ونثبت الأسعار تدريجي عشان الاقتصاد يبقى متماسك.
كمان صندوق النقد الدولي حذر من أي قفزة سريعة للجنيه.. لأنه لو حصل ممكن المستثمرين يفتكروا إن ده اتجاه ثابت ويدخلوا بفلوس كتير.. وبعدها لو حصل أي اضطراب يخرجوا بسرعة ويعملوا أزمة.. الحكومة شايفة إن سعر الجنيه الحالي تنافسي وده بيساعد الصادرات تكبر ويقلل من الواردات اللي ملهاش لازمة.
بص على الصادرات المصرية.. السنة اللي فاتت نزلت 10%.. لكن التوقعات للسنة دي بتقول إنها هتزيد حوالي 12%.. ده غير إن الاحتياطي النقدي وصل أكتر من 48 مليار دولار.. يعني فيه تحسن واضح في التدفقات الدولارية من سياحة وتحويلات المصريين من برة.. وده كله بيقوي موقف الجنيه على المدى المتوسط.
طيب بالنسبة لتقييم الجنيه؟
في مؤسسات كبيرة زي جولدمان ساكس شايفة إن الجنيه مقيم بأقل من قيمته الحقيقية بحوالي 30%.. وده فعلا منطقي لو بصينا على مؤشرات الاقتصاد الكلي وتحسن ميزان المدفوعات.. يعني بمعنى تاني الجنيه عنده فرصة يرجع تاني ويقوى بس مع الوقت مش فجأة.
نيجي بقى للفائدة.. البنك المركزي لسه ماشي بحذر.. فيه توقعات إن الفائدة ممكن تتخفض في الفترة الجاية بس بشكل محدود ما بين 100 لـ 200 نقطة أساس.. ليه مش بيخفض جامد.. لأنه عايز يتأكد الأول إن التضخم راجع ينزل بشكل مستمر.. التضخم المتوقع بنهاية السنة حوالى 13.8 أو 14%.. وده أحسن بكتير من التوقعات القديمة.
الموضوع كله مسألة توازن.. يعني البنك المركزي عايز يشجع النمو الاقتصادي ويجذب استثمارات أجنبية وفي نفس الوقت ما يسيبش التضخم يطلع تاني.. عشان كده أي قرار هيكون محسوب بدقة.. الفايدة العالية بتشد المستثمرين لكن بتبطأ الاقتصاد.. والفائدة المنخفضة ممكن تزود التضخم لو ما كانتش محسوبة.
طيب الجنيه ممكن يستعيد قوته إمتى؟
التوقعات الحالية بتقول إنه ممكن الدولار سعره يفضل مستقر لفترة .. وده منطقي في ظل السياسة التدريجية اللي الحكومة ماشية بيها.. مع زيادة الصادرات وتحسن السياحة وجذب استثمارات جديدة.. كل ده هيخلي التدفقات الدولارية أكبر والجنيه يبدأ ياخد نفسه.
الموضوع مش بس في سعر الصرف.. فيه كمان ضغط من الدين الخارجي.. مصر عندها التزامات ما بين 18 و20 مليار دولار السنة دي.. والدين الخارجي هيبدأ ينزل تدريجي من 2027 مع زيادة الاستثمارات الأجنبية المباشرة وتحسن موارد الدولة..
في الآخر الحكومة مش عايزة الجنيه يطلع بسرعة عشان مش عايزة تعيد نفس أخطاء 2018.. الموضوع محتاج صبر وخطوات محسوبة.. والجنيه مش ضعيف زي ما ناس فاكرة.. ده بالعكس أقل من قيمته الحقيقية.. وكل المؤشرات بتقول إن المستقبل هيكون أفضل لو فضلنا ماشيين بنفس الاستراتيجية.
