تعويضات لعملاء الإنترنت المنزلي بعد حريق سنترال رمسيس.. مين المستحق؟
يا ترى إيه قصة تعويضات الإنترنت المنزلي بعد بعد حريق سنترال رمسيس، مين اللي هيستفيد والنت المجاني ده هيكون لكام يوم؟
في الحقيقة، حصل تطور جديد بعد الحريق اللي حصل في سنترال رمسيس، وخرج الجهاز القومي لتنظيم الاتصالات وأعلن رسميا عن تعويضات إضافية لعملاء الإنترنت المنزلي اللي اتأثروا بانقطاع الخدمة.
كمان، الجهاز قرر يدي تعويض على حسب نوع الاشتراك، بعني لو انت مسبق الدفع، يعني بتشحن باقة كل شهر بنفسك هيتم إضافة 50% من الباقة الأساسية بتاعتك كهدية مجانية.
أما بقى لو انت عميل فاتورة، يعني بتدفع اخر الشهر، فهيجيلك خصم 30% من قيمة الفاتورة اللي جاية، ووده كله طبعا عن الفترة اللي حصل فيها تأثر بالخدمة واللي كانت نتيجة الحريق المفاجئ في السنترال.
والموضوع مش بس تعويض وخلاص، لأ ده كمان الجهاز قال إنه مستمر في متابعة الشركات عشان يضمن إن الخدمة تفضل مستقرة وإن الأعطال الكبيرة دي ما تتكررش تاني، وده تأكيد على إن فيه رقابة ومتابعة من الدولة لحماية حق المستخدم ورضا العميل بقى أولوية مش رفاهية.
طيب إزاي تعرف إنك من العملاء اللي ليك تعويض؟
الموضوع بسيط، لو انت من سكان المناطق اللي الخدمة فيها اتقطعت بسبب الحريق سواء بشكل جزئي أو كلي، فإنت كده من المستحقين، والشركات هتبدأ تبعتلك رسالة تأكيد على الموبايل أو هتلاقي الباقة فعلا زادت لو انت مسبق الدفع، أو هتشوف الخصم على أول فاتورة جاية لو انت عميل فاتورة.
والتعويض ده وفقا للجهاز القومي لتنظيم الاتصالات، بدأ يتنفذ فعلا من يوم 18 يوليو، وده معناه إن المفروض دلوقتي تبقى شايف التأثير في حسابك، ولو ما حصلش، تقدر تتواصل مع خدمة العملاء بتاعة شركتك وتسألهم بشكل مباشر.
فوق كل ده، الجهاز قال بشكل واضح إنه بيشتغل على تعميم نظام التعويضات في كل حالات الانقطاع الكبيرة اللي بيكون فيها خلل من الشركة أو ظروف طارئة زي اللي حصل في سنترال رمسيس، وده جزء من خطة أكبر لتحسين جودة الخدمة ومحاسبة الشركات لما يحصل أي تقصير، وفي النهاية لازم نعرف إن التعويض ده حق المستخدمين.
