ارتفاع محدود.. شوف توقعات أسعار الدهب الفترة الجاية
يا ترى الدهب رايح فين، هيغلى ولا هينزل ولا هنفضل في دوامة التحركات اللي كل يوم بنسمعها ونشوفها، طب امته تستقر أسعار المعدن الأصفر وايه هي الأسعار المتوقعة للفترة الجاية؟
في الساعات الأخيرة، أسعار الدهب سواء عالميا أو محليا شهدت ارتفاع طفيف، وسجلت الاونصة ارتفاع بنسبة 0.3%، وصل بيه لمستوى 3350 دولار، لكن ده مش معناه إن الدهب طاير.
بالعكس، الأسبوع ده كان في تذبذب وتحركات جانبية بسبب حالة عدم اليقين في الأسواق، خاصة حوالين موضوع الفايدة الأمريكية التعريفات الجمركية اللي ترامب بيلوح بيها على المكسيك وأوروبا ودول تانية كتير.
كمان، مؤشر الدولار نزل شوية، بس على مدار الأسبوع كان قوي، خاصا بعد صدور بيانات مبيعات التجزئة الأمريكية اللي طلعت أقوى من التوقعات، وده خلا المستثمرين يرجعوا للدولا، ويقللوا الطلب على الدهب كملاذ آمن، وطبعا لما الدولار يعلى الدهب بيتأثر بشكل سلبي فبينزل، لإن العلاقة بين الاتنين عكسية.
أما الصين، اللي بتعتبر أكبر مستهلك للدهب في العالم، فالموضوع هناك مختلف شوية، لان في شهر يونيو خلص بأكبر ضخ استثماري في صناديق الدهب الصينية بحوالي 8.8 مليار دولار، غير إن البنك المركزي الصيني زوّد احتياطياته من الدهب للشهر التامن على التوالي، ودع معناه في وقت أمريكا بتضغط، ان الصين بتشتري وتخزن.
طيب ايه الدنيا عندنا في مصر؟
بص يا سيدي، سعر الذهب في مصر خاصة "عيار 21" سجل 4655 جنيه للجرام، يعني الدهب اتحرك 5 جنيه بس امبارح، يعني إحنا بنتكلم في ارتفاع محدود جدا، عشات السوق العالمي نفسه مش بيجمع زخم، وكمان سعر صرف الدولار مقابل الجنيه مستقر نسبيا، وده بيأثر مباشرة على تسعير الذهب هنا.
طيب.. إيه توقعات الأسعار الفترة الجاية؟
عالميا، الدهب هيفضل في نفس النطاق المحدود لو استمر الدولار قوي، خاصة إن الفيدرالي لسه مش ناوي يخفض الفايدة قريب.
أما بقى محليا او عندنا في مصر، فك حاجة هتتحدد بحركتين، وهي سعر أونصة الدهب العالمي، وكمان سعر صرف الدولار مقابل الجنيه، يعني لو حصل أي تحرك كبير في الاتنين دول، ساعتها ممكن نشوف قفزات أو هبوط واضح في الأسعار.
لكن حاليا، التوقع الأقرب هو استمرار التذبذب والتحركات المحدودة، يعني لو ناوي تشتري دهب، اعرف إن السوق حاليا في حالة ترقب ومفيش اتجاه واضح سواء صعود أو هبوط، وتابع الدولار والفايدة الأمريكية وخليك دايما جاهز لأي مفاجآت.
