بقرار واحد.. ترامب خلى الاقتصاد العالمي على “كف عفريت”
يا ترى ايه اللي بيعمله ترامب، هل ممكن شوية رسوم جمركية يخلو العالم كله يدخل في تضخم مستمر، ولا احنا داخلين على موجة ركود تضخمي فعلا؟
في الحقيقة، اللي بيحصل في أمريكا دلوقتي بيخلي كل خبراء الاقتصاد في حالة قلق مش طبيعي، والسبب هو الرسوم الجمركية اللي رجع يفعلها الرئيس ترامب.
ومن هنا، بقى الاحتياطي الفيدرالي الأمريكي دلوقتي في لحظة مصيرية، وده لان القرار اللي هياخده بخصوص الفايدة ممكن يغير شكل الاقتصاد العالمي، لأن الرسوم الجمركية الجديدة دي ممكن تبقى عامل تضخمي دائم.
والكلام ده معناه، أن بدل ما الأسعار تزيد مرة وخلاص، لأ ده هيكون في احتمال إن الأسعار تفضل تعلى وتعلى، والناس تفقد الثقة إن التضخم هينزل تاني، والنتيجة طبعا ان قرارات الفيدرالي تتأخر، وسعر الفايدة يفضل ثابت، أو يمكن يعلى كمان.
طب الرسوم دي بتأثر على إيه؟
بكل بساطة، أي مستورد هيضطر يدفع جمرك أكتر على البضاعة اللي جايبها، ودع معناه إنه هيزود السعر على التاجر، اللي هيزوده على المستهلك، يعني إحنا كمستهلكين بندفع تمن السياسات دي في الآخر.
والمشكلة مش بس في أمريكا، ده لما الاقتصاد الأمريكي يسخن أكتر من اللازم بسبب التضخم، فاثره بينتقل لباقي العالم، يعني السلع هتغلى وكمان التجارة هتكون أبطأ، والنمو هيتراجع، وفي الآخر، العالم ممكن يدخل في حاجة اسمها "ركود تضخمي" يعني لا فيه نمو، ولا الأسعار بتنزل.
ومن هنا، كان الاجتماع الأخير الاحتياطي الفيدرالي كشف عن انقسام واضح جوا البنك، يعني في ناس شايفة إن الرسوم هتأثر بشكل مؤقت، وناس تانية شايفة إن التضخم الجاي منها هيبقى مستمر، بس الأكيد إن أغلبهم قالوا احنا محتاجين نكون حذرين جدا.
طيب.. هل ترامب عنده سبب مقنع؟
هو بيقول إن الرسوم دي بتحمي الصناعة الأمريكية من المنافسة الصينية وغيرهم، بس الحقيقة إن اللي بيتأذى هو المستهلك الأمريكي الأول، وكمان المستوردين والشركات.
والمشكلة الأكبر، هي ان الشركات الكبيرة ممكن تبدأ تعتبر الرسوم دي "تكلفة ثابتة"، وتضيفها دايما على السعر النهائي للمنتجات، ودع معناه إن التضخم ممكن يبقى مزمن،وساعتها الفيدرالي هيفضل في دوامة هل يسيب الفايدة زي ما هي؟ ولا يخفض؟ ولا يزود؟، لكن في كل الأحوال السوق هيكون في حالة ترقب وقلق.
والخلاصة، هي ان الرسوم الجمركية مش بس قرار تجاري، دي أداة خطيرة بتأثر على الأسعار والمستهلك، والمستقبل الاقتصادي، ولو أمريكا قررت تكمل على نفس النهج ده يبقى التضخم مش راجع، ودلوقتي هو لسه بيبدأ، ومعاه العالم كله ممكن يلاقي نفسه في أزمة جديدة.
