كنز استثماري راجع للحياة.. يا ترى إيه سر تحرك الحكومة المفاجئ لإنقاذ المناطق الحرة؟
يا ترى إيه خطة الحكومة عشان ترجع المناطق الحرة لسابق عهدها، وإزاي الدولة ناوية تجذب استثمارات ضخمة في المرحلة الجاية؟
في لقاء مهم حصل يوم الخميس اللي فات، رئيس الوزراء الدكتور مصطفى مدبولي اجتمع مع وزير الاستثمار والتجارة الخارجية المهندس حسن الخطيب، والموضوع الأساسي كان عن "إزاي نخلي المناطق الحرة مصدر جذب استثماري ضخم؟".
والفكرة ببساطة، إن الدولة ناوية تعمل نقلة كبيرة في ملف الاستثمار، وخاصة في المناطق الحرة، اللي ليها مميزات خاصة ممكن تجذب مستثمرين من كل حتة في العالم.
وحاليا، الحكومة ماشية بخطى واضحة لتطوير البنية التحتية، وده جزء أساسي لجذب الاستثمار، يعني مش بس بنعرض أراضي أو مناطق، لأ إحنا بنجهزها ونعمل لها بنية محترمة، وكمان الحكومة شايفة إن المناطق الحرة مش بس أماكن شغل، دي كمان مفتاح لزيادة الصادرات، وتقليل الاستيراد، وبالتالي دعم الاقتصاد الوطني.
ومن أهم الحاجات اللي الحكومة بتركز عليها دلوقتي، هي تقديم تسهيلات أكتر للمستثمرين سواء مصريين أو أجانب عشان نكسر أي بيروقراطية أو عقبات كانت بتعطلهم زمان.
فوق كل ده، الدولة بتشتغل على تطبيق نظام الشراكة بين القطاعين العام والخاص، يعني الحكومة تبني والمستثمر يشتغل، وكل طرف يحقق فايدة، عشان كده وطير الاستثمار قال اننا شغالين على خلق بيئة استثمارية جاذبة، وده بيشمل حوافز ضريبية وتسهيلات جمركية وتبسيط في الإجراءات.
الجميل كمان، إن الحكومة بدأت تدعو لحوار مجتمعي عن تطوير المناطق الحرة، يعني مش بتشتغل لوحدها، لأ دي بتسمع رأي رجال الأعمال والمستثمرين والناس اللي على الأرض.
والموضوع مش مجرد كلام، دع في تحركات فعلية حصلت، زي بحث تطوير المنطقة الحرة في عتاقة وده مثال بسيط للي بيحصل في كذا منطقة حرة في مصر.
ونقدر نقول، إن المستهدف من كل ده، هو تمكين القطاع الخاص إنه يقود عملية التنمية، يعني الدولة تفتح الباب والقطاع الخاص يدخل ويخلق فرص عمل ويضخ استثمارات، وفي نقطة مهمة كمان، وهي إن لازم ندعم الصناعة ونقلل التكاليف على المستثمرين عشان نقدر ننافس دول تانية في جذب الاستثمارات.
ومن الحاجات اللي الدولة بدأت تتحرك فيهاؤ، هي رقمنة الإجراءات وتسهيل الحصول على الرخص وتوفير منصات إلكترونية لتسجيل الشركات والتقديم على الأراضي، يعني باختصار، الحكومة بتشتغل على روشتة إنقاذ حقيقية للمناطق الحرة، فيها تخطيط وتطوير وتعاون مع كل الأطراف المعنية.
المناطق الحرة راجعة وبقوة، والدولة قررت تحولها لأماكن نابضة بالاستثمار والصناعة والتصدير، ومع الحوافز والتسهيلات الجديدة مصر ممكن تكون وجهة مفضلة لأي مستثمر بيدور على فرص حقيقية في المنطقة.
