خبر سعيد من المركزي.. هدوء في سوق الذهب.. وطرح شقق جديدة ابتداءً من 15 يوليو 2025
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، خبر سعيد من المركزي، وهدوء في سوق الذهب، وطرح شقق جديدة ابتداءً من 15 يوليو 2025.
ونبدأ من البنك المركزي المصري، اللي قرر يزود الحد الأقصى اليومي لعمليات السحب النقدي من فروع البنوك بالجنيه المصري، وخلّاه 500 ألف جنيه بدل 250 ألف جنيه، وده بشكل مؤقت لحد ما الاتصالات ترجع لطبيعتها بالكامل.
الخدمات الرقمية في البنوك اتأثرت النهارده بسبب إن شبكة الاتصالات اتأثرت بعد الحريق، وكمان البورصة المصرية قررت توقف التداول لجلسة النهارده التلات، علشان شركات السمسرة مش قادرة تتواصل بكفاءة مع باقي أطراف منظومة التداول.
وكمان البنك المركزي قرر يمد مواعيد العمل في بعض فروع البنوك علشان تخدم الناس، على حسب توزيع الفروع في الجمهورية، وده كل بنك بيحدده، والمواعيد الجديدة هتبقى لحد الساعة 5 مساءً بدل 3 العصر، وده خلال أيام العمل الرسمية من الحد للخميس، وده ابتداءً من النهارده التلات 8 يوليو 2025، لحد ما تطلع تعليمات تانية.
ونروح لسوق الذهب... أسعار الذهب في السوق المحلي استقرت مع بداية تعاملات النهارده، عند نفس المستويات العالية اللي سجلتها في تعاملات امبارح بالليل، وسعر جرام الذهب عيار 21 بقى حوالي 4645 جنيه.
وسجل جرام الذهب عيار 24 حوالي 5309 جنيه.
وعيار 22 حوالي 4866 جنيه.
وعيار 21 حوالي 4645 جنيه.
وعيار 18 حوالي 3981 جنيه.
وعيار 14 حوالي 3097 جنيه.
أما الجنيه الذهب فسعره وصل لـ 37,160 جنيه.
وسعر الأوقية عالميًا بقى 3332 دولار.
ونروح للمهندس شريف الشربيني، وزير الإسكان والمرافق والمجتمعات العمرانية، اللي أعلن إن هيتم طرح كراسات الشروط للتقديم في المرحلة التانية من المبادرة الرئاسية "سكن لكل المصريين 7" للي دخلهم منخفض أو متوسط، وده هيبدأ من يوم 15 يوليو 2025.
وأضاف الوزير إن الطرح الجديد فيه إجمالي 113,112 وحدة سكنية، متقسمة لـ 99,792 وحدة بتتطرح لأول مرة، و13,320 وحدة كانت اتطرحت قبل كده في إعلانات سابقة، بمساحات من 75 لـ 90 متر.
وأوضح كمان إن الطرح التاني من المبادرة هيشمل وحدات جاهزة للتسليم بمقدم حجز 25 ألف جنيه، وكمان وحدات لسه تحت الإنشاء وبتتسلّم خلال 36 شهر بمقدم حجز 50 ألف جنيه.
ونختم بخبر مهم جدًا... مصدر في قطاع الاتصالات كشف إن خدمات الكاش بدأت ترجع تدريجيًا في بعض شركات الاتصالات بعد ما اتأثرت بسبب حريق سنترال رمسيس اللي حصل امبارح الاتنين، واللي أثّر على الاتصالات في محافظات كتير وخدمات المحافظ الإلكترونية والكاش.
والمصدر قال في تصريح لموقع القاهرة 24، إن شركتين من شركات الاتصالات خدماتهم رجعت تشتغل بالكامل بعد ما كانت واقفة لأكتر من 12 ساعة.
وعدد من الناس اشتكوا إن النت الأرضي كان فيه مشاكل في محافظات في الوجه البحري والقبلي.
ويُذكر إن امبارح الاتنين 7 يوليو 2025، حصل حريق في سنترال رمسيس في شارع الجمهورية بمنطقة الأزبكية بوسط البلد، وقوات الحماية المدنية نزلت بعدد من عربيات الإطفاء علشان يسيطروا على الحريق ويمنعوا إنه يوصل للمباني اللي حواليه.
