من غير ما تدفع كتير.. إزاي ترشد استهلاك الكهرباء في الصيف؟
الصيف دخل رسمي والحر بقى مولع، يعني الأجهزة شغالة طول اليوم، وفاتورة الكهرباء بقت بأسعار خيالية، بس الحل هنا أنك لازم ترشد استهلاك الكهربا على قد ما تقدر.. بس يا ترى هتعمل كده إزاي؟.. وإيه الحل عشان متدفعش فلوس كتير.
كل ما نستهلك كهربا زيادة، الضغط بيزيد على الشبكة وساعات بيحصل تخفيف أحمال، طيب نعمل إيه؟.. خليني أقولك على شوية حاجات بسيطة تفرق جدًا، ودي نصايح هتوفرلك الكهربا في الحر ده.
أول حاجة لازم تاخد بالك منها، أنك تطفي النور لما تخرج من الأوضة، كل لمبة بتفرق، كمان لازم تستخدم لمبات الليد ودي من مميزاتها أقل في الاستهلاك وأطول في العمر، وشغل التكييف على 24 درجة، دي الدرجة المثالية للتبريد وكمان بتوفر الطاقة، كمان لازم تفصل فيشة الأجهزة اللي مبتستخدمهاش سواء كمبيوتر أو شاحن أو ميكروويف.
مش بس وكده، ده فيه حاجات عمرك ما كنت تتوقع أنها بتزود فاتورة الكهربا، واللي منها أنك ممكن تشتغل غسالة الملابس على شوية صغيرين، كمان لازم تفتح التلاجة عدد مرات أقل، لأن كل فتحة بتخليها تستهلك كهربا أكتر عشان ترجه تبرد.
ولو فاتورة الكهربا بقت تقيلة على قلبك، خليني أقولك شوية خطوات بسيطة هتفرق معاك كتير، زي مثلا متنساش تنضف فلتر الهواء في التكييف، لأن لو الفلتر مسدود، التكييف هيستهلك كهربا أكتر، ده غير أنك لازم تشغل السخان وقت الحاجة وتشيل الفيشة باستمرار، ولو فيه تسريب من أي ماسورة متوصلة بالسخان، لازم تصلحه فورًا، لأن ده بيزود استهلاك الكهربا من غير ما تحس.
طيب والدولة بتعمل إيه؟، وزارة الكهرباء بالتعاون مع وزارة البترول بدأت خطة ضخمة لضمان استمرار الكهربا من غير قطع، لأن مصر شغالة على ضخ كميات كبيرة من الغاز الطبيعي لمحطات الكهرباء، خصوصًا في فترات الذروة، علشان نقدر نشغل المحطات بكفاءة عالية من غير ما نخفف الأحمال، لأن الغاز الطبيعي هو الوقود الأساسي لتوليد الكهربا في مصر، ومع زيادة الإنتاج المحلي، الدولة بتحاول تأمن كميات تكفي حتى في أقصى درجات الحر.
يعني الخلاصة؟.. الدولة بتضخ غاز علشان الكهربا تفضل واصلة وإحنا علينا نساعد بشوية توفير بسيط، وكل لمبة تطفيها، كل درجة ترفعها في التكييف، بتفرق، كلنا مع بعض نقدر نقلل استهلاك الكهربا، ونعدي الصيف من غير قطع.. ومن غير مفاجآت.
