خبر سعيد من البنك المركزي.. ارتفاع مفاجئ للدولار.. وتعديلات جديدة لتنمية صناعة السيارات
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، خبر سعيد من البنك المركزي، وارتفاع مفاجئ للدولار، وتعديلات جديدة لتنمية صناعة السيارات.
نبدأ أول أخبارنا من البنك المركزي.. واللي أعلن إن صافي الاحتياطي النقدي الأجنبي لمصر وصل لـ 48.7 مليار دولار في نهاية يونيو 2025.. بعد ما كان 48.526 مليار دولار في مايو.. يعني زاد حوالي 174 مليون دولار في شهر واحد.
الاحتياطي ده عبارة عن سلة عملات أجنبية مهمة.. زي الدولار الأمريكي واليورو والجنيه الإسترليني والين الياباني واليوان الصيني.. والنسبة اللي بنمتلكها من كل عملة بتتوزع حسب أسعار الصرف العالمية واستقرار السوق.. والبنك المركزي بيحدد النسب دي بخطة مدروسة.
طيب.. إيه فايدة الاحتياطي ده؟
الاحتياطي ده مهم جدًا علشان نقدر نوفّر السلع الأساسية للناس في أي وقت.. نسد أقساط وفوايد الديون الخارجية.. ونواجه أي أزمة اقتصادية ممكن تحصل.. خصوصًا لو حصل نقص في موارد العملة الصعبة زي السياحة أو التصدير.
ونروح دلوقتي لـ سوق الصرف.. واللي بدأ تعاملات النهاردة على ارتفاع في سعر الدولار مقابل الجنيه.. وسجّل أعلى سعر في بنك الأهلي المتحد عند 50.52 جنيه للشراء و 50.62 جنيه للبيع.
نفس السعر بالظبط سجّله بنك فيصل الإسلامي وأبوظبي الإسلامي وبنك saib.
وفي المصرف العربي الدولي.. الدولار سجل 50.51 للشراء و50.61 للبيع.
أما في بنك HSBC فسعر الدولار بقى 50.51 للشراء و50.61 للبيع..
وفي بنوك زي الأهلي المصري وقناة السويس السعر كان 50.49 للشراء و50.59 للبيع.
وأقل سعر شوفناه كان في بنك مصر بـ 50.31 للشراء و50.41 للبيع.
وآخر خبر معانا من هيئة قناة السويس..
الفريق أسامة ربيع رئيس الهيئة قابل السفير ثاناوات سيريكول سفير مملكة تايلاند الجديد في القاهرة.. ودي كانت أول زيارة رسمية له بعد ما استلم منصبه.
اللقاء ركز على تعزيز التعاون الاقتصادي بين البلدين.. واستغلال فرص تبادل الخبرات ونقل التكنولوجيا في مجالات مختلفة.
وربيع قال إن قناة السويس دلوقتي بتمر بتحول كبير في أنشطتها الاقتصادية.. وده جزء من خطة شاملة لتنويع مصادر الدخل عن طريق تقديم خدمات بحرية ولوجستية جديدة تخدم حركة التجارة اللي بتمر من القناة.
وأشار كمان إن الهيئة بدأت فعلاً تقدم خدمات زي تموين الوقود للسفن والإسعاف البحري وتبديل أطقم السفن وجمع المخلفات.. بجانب تطوير أنشطة بناء الوحدات البحرية وصيانة وإصلاح السفن عن طريق الشركات والترسانات التابعة للهيئة.
