أثاث دمياطي.. وفلوس بالملايين.. شوف مكاسب «صنع في دمياط» الاقتصادية
يا ترى إيه اللي حصل في معرض "صنع في دمياط"، وليه كل الناس بتتكلم عنه، والمعرض ده كسب إيه؟
في الفترة من 26 يونيو لحد 5 يوليو، أرض المعارض في مدينة نصر كانت على موعد مع حدث اقتصادي وصناعي مهم جدا، ودي كانت النسخة ال 24 من معرض "صنع في دمياط"، واللي شارك فيه عشرات من صناع الأثاث من محافظة دمياط.
ونقدر نقول، إن المعرض دخ ماكانش مجرد عرض منتجات، ده كان فرصة حقيقية للصنايعية والمصانع الصغيرة إنها تعرض شغلها للعالم، ومن هنا قال باسل رحمي، الرئيس التنفيذي لجهاز تنمية المشروعات، إن المعرض ده لوحده ومع المعارض اللي قبل كده، حققوا مبيعات وتعاقدات ب 400 مليون جنيه، مش بس بيع مباشر، لكن كمان اتفاقيات وتعاقدات لمشاريع مستقبلية.
كمان، شارك في المعرض أكتر من 1200 مشروع على مدار النسخ كلها، وكل مشروع من دول وراه أسرة، وعمال، وشغل بيتبني.
فوق كل دع، المعرض ده مش بس لترويج الأثاث، لكنه كمان خطوة كبيرة لتسويق المنتج الدمياطي محليا وعالميا، خاصة إن التصميمات والجودة كانت على أعلى مستوى، والأسعار تنافسية جدا.
بردو، الدكتور أيمن الشهابي، محافظ دمياط، قال إن المعرض ده جزء من خطة الدولة لدعم الصناعة الدمياطية اللي بتمثل تراث كبير ومصدر رزق لآلاف الأسر.
وعلشان الصورة تبقى كاملة، فجهاز تنمية المشروعات ضخ من 2014 لحد دلوقتي تمويلات بحوالى 270 مليون جنيه لمشروعات الأثاث في دمياط، ومول أكتر من 6 آلاف مشروع وفروا ما يقرب من 19 ألف فرصة عمل.
وكمان، في مبادرة جديدة شغالة اسمها "تدوم دمياط"، وهدفها دعم الورش والمصانع الصغيرة بتمويلات متوسطة حوالى 400 ألف جنيه للمشروع الواحد، والمعرض نفسه بيفتح أبوابه كل يوم من 10 الصبح لـ10 بليل، والناس من القاهرة، ووالمحافظات بيجوا يختاروا من أجود أنواع الأثاث الدمياطي لغرف النوم، السفرة والأطفال وكمان الانتريهات.
ونقدر نقول، إن معرض "صنع في دمياط" مش معرض عادي، ده نموذج حقيقي بيعرفنا إزاي الدولة بتدعم الصناعة المحلية، وإزاي ممكن تخلق فرص عمل وتفتح أسواق جديدة، وتخلي المنتج المصري له مكان وسط المنافسة.
وعشان كده، المعرض ده يقولنا أد ايه الحكومة بتدعم الصنايعية المصريين اللي بيحطوا بصمتهم في كل قطعة أثاث.
