بمقدم 50 ألف جنيه.. إزاي تاخد شقة من مبادرة "سكن لكل المصريين 7"
عايز شقة؟.. وكل ما تسأل حد يقولك الأسعار نار؟.. احنا بقة هنقولك إزاي تاخد شقتك من الحكومة بفرصة حلوة وبمقدمة يبدأ بـ50 ألف جنيه بس.. بس يا ترى مساحتها كام؟.. وإيه الشروط اللي حطاها وزارة الإسكان.
وزارة الإسكان عاملة مبادرات إسكان اجتماعي ومتوسط، وبتوفر شقق جديدة في مدن كتير حوالين مصر، زي أكتوبر، العبور الجديدة، حدائق العاصمة، بدر، العاشر، أسيوط الجديدة، سوهاج الجديدة… وغيرهم.
بس ميعاد التقديم هيكون امتى؟
وزارة الإسكان هتبدأ فتح باب حجز الشقق الإسكان الاجتماعي الجديدة يوم 8 يوليو الجاري وهيستمر التقديو لحجز الوحدات السكنية في مبادرة "سكن لكل المصريين 7" لحد يوم 7 أغسطس 2025.
طيب مقدم الحجز كام وطريقة الدفع؟
المفاجأة بقى اللي بتعملها الحكومة للناس، أن محدودي الدخل هياخدوا الشقق بفايدة 8% سنويا، بمقدم 50 ألف جنيه، أما بقى متوسطي الدخل هياخدوا الشقق بفايدة 12% سنويا هتوصل لـ20 سنة، وده بمقدم 100 ألف جنيه.
طب والشروط؟
لازم يكون الحد الأقصى لصافي الدخل للمتقدم لمنخفضي الدخل سنويا هو 144 ألف جنيه، وشهريا لازم يكون 12 ألف جنيه بالنسبة للفرد، و180 ألف جنيه سنويا و15 ألف جنيه شهريا للأسرة.
أما بقى الحد الأقصى لمتوسطي الدخل السنوي 240 ألف جنيه و20 ألف شهريا وبالنسبة للأسرة 300 ألف سنويا و25 ألف جنيه شهريا.
طيب الشقق دي هيتم طرحها فين؟
الطرح الجديد هيكون في مدن اﻟﻌﺑور اﻟﺟديدة، واﻟﻌﺎﺷر من رمضان، وﺣداﺋﻖ اﻟﻌﺎﺻﻣﺔ، و15 مايو، وأخميم الجديدة، وأﺳوان اﻟﺟديدة، وأكتوبر الجديدة، والسادات، وبدر، وطيبة، وبرج العرب، وسوهاج الجديدة، وقنا الجديدة، والمنيا الجديدة.
كمان هيتضمن الطرح وحدات سكنية بعدد من المراكز بمحافظات، أسوان، وأسيوط، والأقصر، والجيزة، والفيوم، والمنيا، والمنوفية، وسوهاج، وقنا، ودمياط، والبحر الأحمر، والدقهلية، والوادي الجديد، ومطروح، والبحيرة، واللي هتكون بمساحات ما بين 75 متر و90 متر.
